گەورەترین ئۆپەراسیۆن بۆ کۆتاییهێنان بە شانە نوستووەکانی داعش دەست پێدەکات

ئاڤا نیوز

 

سەرچاوەیەکی ئەمنی بڵاویکردەوە، ئۆپەراسیۆنێکی سەربازی بۆ لەناوبردنی شانەکانی داعش لە دۆڵی زغێتون لە نێوان پارێزگای کەرکووک و سەڵاحەدین بە چڕی دەستیپێکردووە.

 

وێنە گەورەکە:  بەپێی ئاماری دەزگای دژە تیرۆری عێراق، لە ماوەی ساڵی ڕابردوودا هێزە ئەمنییەکان 344 ئۆپەراسیۆنیان دژی پەناگەی داعش کردووە و تێیدا  144 تیرۆرستیان دەستگیرکردووە، 70 ـی دیکەشیان كوشتووە و 310 پەناگەی تیرۆرستانیان لە ناوچە جیاجیاكانی وڵات بەتەواوی خاپوور كردووە.

 

ڕاگەیێنراوی فەرمی: سەرچاوەیەكی ئەمنی لە فەرماندەیی ئۆپەراسیۆنەكانی كەركووك ڕایگەیاند:

 

- سەر لەبەیانی ئەمڕۆ هەینی 10-1-2025 ئۆپەراسیۆنێكی زەمینی بۆ لەناوبردنی شانە نووستووەكانی داعش لە دۆڵی زغیتۆن لە ڕۆژئاوای پارێزگای کەرکووک، بەرەو سەڵاحەدین بەچڕی دەستیپێکردووە.

 

- ئامانج لە ئۆپەراسیۆنەکە کۆتاییهێنانە بە بوونی شانە نوستووەکانی داعش لەنێو ئەو دۆڵە و دەورووبەری کە بووەتە پەناگەی چەکدارانی داعش.

 
ئەمەش بزانە: ئۆپەراسیۆنەکە بریتییە لە داخستنی بۆشاییە ئەمنییەکان و خاپورکردنی حەشارگەکانی ڕێکخراوەکە و داخستنی ڕێڕەوی دزەکردن و جوڵەی تیرۆریستان بەتەواوی لە دۆڵەکەدا