ئەنجوومەنی پارێزگای كەركووك پشووێكی كاكەییەكان هەڵدەوەشێنێتەوە

ئاڤا نیوز

 

ئەنجوومەنی پارێزگای كەركووك پشووێكی تایبەت بە پێكهاتەی كاكەییەكان هەڵدەوەشێنێتەوە بە بیانووی ئەوەی كاكەییەكان هۆزن نەك پێكهاتە.

 

وێنە گەورەكە: ئەنجوومەنی پارێزگای كەركووك بە نووسراوێكی فەرمی كە وێنەیەكی دەست ئاڤا میدیا كەوتووە، نووسراوێكی پێشووی هەڵدەوەشێنێتەوە كە ڕۆژی یەكشەممە 12-1-2025 دەریكردبوو تێیدا بەبۆنەی جەژنی قەوڵتاسی تایبەت بە پێكهاتەی كاكەییەكان، ڕۆژێك پشووی ڕاگەیاندبوو.

 

نووسراوی فەرمی: نووسراوێكی ئەنجوومەنی پارێزگای كەركووك بە ژمارە 124 لە 13-1-2025 دەست ئاڤا میدیا كەوتووە و تێیدا، لەسەر داوای ئەندامێكی ئەنجوومەنەكە نووسراوێكی پێشووی هەڵدەوەشێنێتەوە كە جەژنی (قەوڵتاس)ـی تایبەت بە كاكەییەكانی وەك پشووی ڕەسمی ناساندبوو.

 

ئەوەی پێویستە بیزانیت: قەوڵتاس یاخود سێ شەوەی یاران جەژنێكی تایبەت بە پێكهاتەی كاكەییەكانە، بەڕۆژووبوونی قەوڵتاسی لە چواردەیەمی چلەی گەورەی زستان تاوەکو حەڤدەیەمی زستانە. ئەو یارسانانەی کە سێ رۆژی یارانی قەوڵتاس بەڕۆژوو دەبن، بڕوایان وایە لەوکاتەوە بە ئەمری سوڵتان سوهاک و بە شوکرانەی ڕزگاربوونی یاران، بەڕۆژووبوون لە سێ ڕۆژی ڕۆژووی قەوڵتاس بەسەریاندا واجب کراوە و لە شەوی سێیەمدا دەبێتە جەژنیان و ڕێوڕەسمی جەژن دەگێڕن.