غەززە و سووریا پرسە سەرەکییەکانی کۆڕبەندی ئەمساڵی داڤۆس دەبن

ئاڤا نیوز

لووتکەی داڤۆسی ساڵی 2025  لە هەفتەی داهاتوودا لە ڕێککەوتی 20 بۆ 24ی مانگ دەبەسترێت و  پرسەکانی غەززە و سووریا بابەتی سەرەکی کۆڕبەندەکە دەبن.

 

وێنە گەورەکە: ساڵانە کۆڕبەندی ئابووریی جیهانی داڤۆس لە سویسرا دەبەسترێت و سەرکردەی زۆربەی وڵاتانی جیهان بەشدار دەبن و پرسە هاوبەشەکان قسەی لەسەر دەکرێت و بڕیاریان لە بارەوە دەدرێت.  

 

لێدوانی فەرمی: بۆرغ برێندی، بەڕێوەبەری جێبەجێکاری کۆڕبەندی ئابووریی داڤۆس دەڵێت: لە کۆڕبەندی ئەمساڵ چەند پرسێکی گرنگ تاوتوێ دەکرێن، لەوانە ململانێکانی ڕۆژهەڵاتی ناوەڕاست لە نێویاندا غەززە و سووریا. هەروەها بابەتەکانی وەک هاوکاری نێودەوڵەتی و ڕووبەڕووبوونەوەی ئاستەنگە جیهانییەکان و گۆڕانەکانی کەشوهەوا بەتایبەت لەژێر ڕۆشنایی ئاگرە گەورەکەی کالیفۆرنیا لەم کۆڕبەندەدا باسدەکرێن.

 

زانیاریی زیاتر: کۆڕبەندی ئەمساڵی داڤۆس لەژێر ناونیشانی 'هاوکاریی بۆ سەردەمی زیرەک' بەئامادەبوونی سێ هەزار بەشداربوو لە 130 وڵاتی جیهانەوە دەبەسترێت، لە نێویاندا 1600 سەرکردەی بازرگانی بەشداری تێدا دەکەن. 

 

ئەمەش بزانە: مەسرور بارزانی، سەرۆکوەزیرانی هەرێمی کوردستان یەکێکە لە میوانە کاریگەرەکانی کۆڕبەندی ساڵانەی داڤۆس و ئەمساڵیش لەپاڵ سەرۆک و سەرکردەی وڵاتان بەشدار دەبێت و چەندین دیداری دەبێت.