بایدن و ترەمپ شەڕ بۆ ئاگربەستی غەززە دەکەن

ئاڤا نیوز

هەر یەکە لە ڕاوێژکارانی بایدن و ترەمپ لەسەر ئاگربەستی غەززە دەدوێن و دووپاتیدەکەنەوە هەردوو ئیدارەی بایدن و ترەمپ هەوڵی ئاگربەست لە غەززە دەدەن.

 

چی ڕوودەدات: ئیدارەی جۆ بایدن، سەرۆکی ئێستای ئەمریکا لە لایەک و ئیدارەی نوێی ئەمریکا بە سەرۆکایەتی دۆناڵد ترەمپ کە بەم نزیکانە دەست بەکار دەبێت لەلایەکی ترەوە، لە کێبڕکێدان بۆ کارکردن لەسەر ئاگر بەست لە غەززە و ئاڵوگۆری بارمتەکان.

 

لێدوانە فەرمییەکان:

- جەیک سولیڤان ڕاوێژکاری ئاسایشی نیشتمانی کۆشکی سپی لە ئیدارەی جۆبایدن سەرۆکی ئەمریکا ڕایگەیاند، ئیدارەی بایدن هیوادارە لەم هەفتەیەدا ڕێککەوتنی ئاگربەست و ئاڵوگۆڕی بارمتەکان ڕابگەیێندرێت، بەڵام جێبەجێکردنی ڕاستەقینەی ڕێککەوتنەکە بۆ ئیدارەی داهاتوو دەمێنێتەوە.

 

- مایک واڵتز ڕاوێژکاری ئاسایشی ئیدارەی داهاتووی دۆناڵد ترەمپ سەرۆکی هەڵبژێردراوی ئەمریکا ڕایگەیاند،  شتەکان زۆر گۆڕاون، هەر بۆیە پێمانوایە زۆر نزیکین لە بەدەستهێنانی جۆرێک لە ڕێککەوتن لە ماوەیەکی کورتدا. 

 

زانیاریی بەدەستهاتوو: وەزارەتی دەرەوەی ئەمریکا دووپاتیکردەوە، لەگەڵ هاوبەشەکانیان کاردەکەن بۆ گەشەپێدانی بەرنامەی دوای کۆتاییهاتنی شەڕ لە غەززە، ئەگەر حەماسیش ڕەزامەندی لەسەر بدات، ئاگربەستەکە ڕاستەوخۆ دەکەوێتە بواری جێبەجێکردنەوە. واشنتن کار بۆ ئاگربەستێکی هەمیشەیی دەکات، دەبێت نەخشەڕێگایەکیش ئامادەبکرێت، بەڵام جێبەجێکردنی ئەم بەرنامەیە دەگەڕێتەوە بۆ ئیدارەی داهاتووی ئەمریکا.