ساڵی ڕابردوو داهاتی نانەوتی لە عێراق بەڕێژەی 50% زیادی کردووە

ئاڤا نیوز

 

هەرچەندە بەراورد بە ساڵی 2023، ساڵی ڕابردوو داهاتی نانەوتی لە عێراق بەڕێژەی 50% زیادی کردووە، بەڵام پەرلەمان و حکومەتی فیدراڵ دەڵێن، هێشتا داهاتی نانەوتی لە ئاستی پێویستدا نییە و بۆ ئەمساڵ کار لەسەر زیادکردنی داهاتەکان دەکەن.

 

ئەوەی پێویستە بیزانیت: داهاتی نانەوتی نزیکەی 14%ـی کۆی داهاتی عێراق پێکدەهێنێت و ساڵی ڕابردوو گەیشتووەتە 14 تریلیۆن دینار، بەپێی پلانی حکومەتی عێراق دەیانەوێت ڕێژەکە بگەیێنرێتە 20%، تاوەکو قۆناغ بە قۆناغ پشتبەستنی ڕەها بە داهاتی فرۆشتنی نەوت کەم بکرێتەوە.

 

لێدوانی فەرمی: عەتوان عەتوانی، سەرۆکی لیژنەی دارایی لە پەرلەمانی عێراق بۆ ئاژانسی هەواڵی فەرمی عێراقی ڕایگەیاند:

 

- ئەمڕۆ لیژنەکەیان میوانداریی بەرپرسانی دەستەی گشتیی باج و گومرگی کرد، لە کۆبوونەوەکەشدا گفتوگۆ لەسەر داهاتی نانەوتی ساڵی ڕابردوو و پلانی زیادکردنی داهات بۆ ئەمساڵ کراوە.

 

 - خواستێکی ڕاستەقینە هەیە بۆ گەشەپێدانی بەردەوام و هەمووانیش کۆدەنگن لەسەر ئەوەی نابێت داهاتی نەوت تاکە سەرچاوەی گەشەپێدانی وڵات بێت، بەڵکو دەبێت پلانی جێگرەوەی پیشەسازیی و هەمەجۆری دارایی هەبێت، بۆیەش لە کۆبوونەوەکەدا گفتوگۆ لەسەر زیادکردنی داهاتەکانی عێراق بۆ ساڵی 2025 کراوە.