پڕۆژەی ڕێککەوتنی غەززە پەسەند دەکرێت

ئاڤا نیوز

وا بڕیارە ئەمڕۆ کابینەی جەنگی ئیسرائیل لەبارەی ئاگربەستی غەززە کۆببێتەوە و ڕێککەوتنەکە پەسەند بکات.

وێنە گەورەکە: دوای ڕەزامەندیی بنیامین نەتەنیاهۆ، سەرۆکوەزیرانی ئیسرائیل، ڕۆژی هەینی 17-1-2025 کابینەی جەنگی ئیسرائیل کۆدەبێتەوە و پڕۆژەی ڕێککەوتنی غەززە پەسەند دەکات. نووسینگەی سەرۆکوەزیرانی ئیسرائیل ڕاشیگەیاندووە کە دوای کابینەی جەنگ، کابینەی حکومەتیش کۆببێتەوە و ڕێککەوتنەکە پەسەند بکات.

لێدوانی فەرمی: ئیتمار بن گڤیر، وەزیری ئاسایشی نیشتیمانیی ئیسرائیل، دژایەتیی خۆی بۆ ئاگربەستەکە دەربڕیوە و ڕایگەیاندووە ئەگەر کابینە پەسەندی بکات ئەوا خۆی و هاوحیزبییەکانی لە حکومەت دەکشێنەوە. ئەو ڕێککەوتنەکەی بە شکستێکی گەورە و بەئازار بۆ ئیسرائیل وەسف کردووە و گوتوویەتی ئیسرائیل نەیتوانیوە بگات بەو ئامانجانەی کە ئەم شەڕی لە پێناویاندا دەستپێکردووە، بۆیە دەبێت لە شەڕ بەردەوام بێت.

ئەوەی پێویستە بیزانیت: ڕێککەوتنی غەززە ئاگربەست و بەردانی بارمتەکان لە خۆدەگرێت و لە ڕۆژی یەکشەممە، 19-1-2025ـەوە دەکەوێتە بواری جێبەجێبوون.