شاندێکی کوردستان بۆ ڕێککەوتنێکی نوێ لەبارەی مووچە دەچێتە بەغدا

ئاڤا نیوز

شاندێکی باڵای هەرێمی کوردستان بۆ گفتوگۆکردن لەبارەی پرسی مووچە ڕێککەوتنێکی نوێ سەردانی بەغدا دەکات، لەم ڕۆژانەش لیستی مووچەی مانگی یەک بۆ بەغدا دەنێردرێت.

وێنە گەورەکە: كێشەكانی ساڵی ڕابردووی نێوان هەولێر و بەغدا كەڵەكە بوون ، هەموو ئەو ڕێککەوتنانەی پێشتر هەبوون لەبارەی مووچە تایبەت بوون بە ساڵی 2024، بۆیە پێویستە ڕێککەوتنێکی نوێ بکرێت، بەتایبەت ئێستا کێشە بۆ مووچەی مانگی یەک دروست بووە و هیچ بڕیارێک بۆ ناردنی نییە.

زانیاریی تایبەت: شاندی کوردستان  لە د.ئومێد سەباح، سەرۆکی دیوانی ئەنجوومەنی وەزیران و د.ئامانج ڕەحیم، سکرتێری ئەنجوومەنی وەزیران و چەند بەرپرسێکی دیکە پێکدێت، لەگەڵ تەیف سامی و وەزارەتی دارایی عێراق کۆبوونەوە و دانیشتنیان دەبێت، تاوەکو ئێستاش ڕوون نییە لەگەڵ سوودانی کۆدەبنەوە یان نا.

بۆچی گرنگە: لەگەڵ بەرپرسانی عێراق ئامادەکاری بۆ ڕێککەوتنی نوێ و دۆزینەوەی میکانیزمێک بۆ ناردنی مووچەی مانگی یەک و کۆی مووچەکانی ئەمساڵ دەکەن. گفتوگۆش لەبارەی پشکی هەرێمی کوردستان لە بودجە و شایستە داراییەکان دەکەن، لەگەڵ ڕادەستکردنی داهاتی ناوخۆ و هاوتاکردنی مووچەی خانەنشینان و بابەتەکانی دیکەی پەیوەست بە مووچەی فەرمانبەران.

لەلایەکی دیکەوە: ئامادەکردنی لیستی مووچەی مانگی یەک لە قۆناغی کۆتایی دایە، سبەی یەکشەممە دوایین ڕۆژە و دەبێت یەکەی ژمێریاری سەرجەم وەزارەتەکان لیستی مووچە بە ئەلیکترۆنی و سیستەمی پەیرۆڵ بۆ وەزارەتی داریی بنێرن، لەم یەک دوو ڕۆژەش بۆ بەغدا دەنێردرێت.

ئەمەش بزانە: بڕیار بوو  شاندی هاوبەشی پارتی و یەکێتی کە پێکدێن لە وەزیرانی کورد لە حکومەتی عێراق  لەگەڵ سوودانی کۆبنەوە بۆ گەیاندنی پەیامی هەرێمی کوردستان لەبارەی مووچە و بودجە و شایستە داراییەکان کە لە کۆبوونەوەی نائاسایی 11ی مانگی ئەنجوومەنی وەزیرانی کوردستان بڕیاری لەسەر درا، بەڵام کاتی کۆبوونەوەکە تا ئێستا دیارنییە.