واشنتن پۆست: گووگڵ یارمەتی سووپای ئیسڕائیلی داوە

 

ئاڤا نیوز

ڕۆژنامەی واشنتن پۆستی ئەمریکی ئاشکرای دەکات، کۆمپانیای گووگڵ یارمەتی ئیسڕائیلی داوە لە شەڕی غەززە بە دابینکردنی نوێترین تەکنەلۆژیای زیرەکی دەستکرد.

وێنە گەورەکە: ماوەی 15 مانگ شەڕی نێوان سوپای ئیسڕائیل و بزووتنەوەی حەماس لە کەرتی غەززە بەردەوام بوو، بەهۆیەوە بە سەدان کەس کوژران و بریندار بوون، هاوکات چەندین خانوو و باڵەخانە خاپوور بوون و بە سەدان خێزانیش ئاوارەبوون.

هەرچەندە کۆمپانیای گووگڵ چەندین جار ڕەتیکردووەتەوە کە بەشداری و یارمەتی ئیسڕائیلی دابێت لە شەڕی کەرتی غەززە، بەڵام ڕۆژنامەکە بەڵگەنامەیەکی ئاشکرا کردووە و ڕایدەگەیێنێت گووگڵ لە سەرەتای دەستپێکردنی شەڕی غەززە یارمەتی ئیسڕائیلی داوە.

زانیاری بەدەستهاتوو: ڕۆژنامەی واشنتن پۆست ئاشکرای کردووە، لە هەفتەکانی یەکەمی هێرشی ئیسڕائیل بۆ سەر کەرتی غەززە کاریان کردووە بۆ دابینکردنی نوێترین تەکنەلۆژیای زیرەکی دەستکرد بۆ سوپای ئیسڕائیل و بەکارهێنیان بۆ بواری سەربازی.

زانیاری زیاتر: ڕۆژنامەکە لە زاری کارمەندێکی کۆمپانیاکە بڵاویکردەوە، زیاتر لە 100 کارمەندی کۆمپانیای گووگڵ داوایان کردووە کۆمپانیاکە پێداچوونەوە بە کارەکانی لەگەڵ سوپای ئیسڕائیل بکات، بەڵام کۆمپانیاکە بە تەواوی پشتگوێی خستوون و ساڵی ڕابردووش زیاتر لە 50 کارمەندی لە کارەکانیان دوورخستەوە، دوای ئەوەی ناڕەزایەتیان دەربڕی بوو بەرامبەر بەوەی یارمەتی سوپای ئیسڕائیل دەدات و  زیان بە فەڵەستینییەکان دەگەیێنێت.