بەرزبوونەوەی پلەکانی گەرما ئەمریکا و ئەوروپای کردووەتە نیشتمانی جرجەکان

 

ئاڤا نیوز

بەهۆی گۆرانی کەشوهەوا و بەرزبوونەوەی پلەکانی گەرما لە وەرزی سەرما، ژمارەی جرجەکان لە شارەکانی ئەمریکا زیادیانکردووە.

چیرۆکی سەرەکی: ژمارەی جرجەکان لە شارەکانی واشنتۆن دی سی و سان فرانسیسکۆی ئەمریکا زیادبووە و زانایانیش هۆکارەکەی بۆ گۆڕانی کەشوهەوا و بەرزبوونەوەی پلەکانی گەرما لە وەرزی سەرما دەگەڕێننەوە بەجۆرێک کاتێک لە زستاندا پلەکانی گەرما بەرزدەبن جرجەکان دێنە دەرەوە و ماوەیەکی زیاتر بەسەر دەبەن لە پەیداکردنی خۆراک ئەمەش دەبێتە هۆی زۆر بوونی زاوزێ و ژمارەیان زیاد دەکات.

زیانە سەرەکییەکان: یەکێک لە مەترسییەکان ئەوەیە ئەم جرجانە دەچنە ناو بینا و خانووەکان و پێداویستییەکانی مرۆڤ تێکدەدەن و دەبنە هۆی بڵابوونەوەی نەخۆشی.

ژمارەکان وا دەڵێن: بەپێی توێژینەوەیەکی زانکۆی ڕیچمۆندی ئەمریکی، لەسەر ئاستی جیهان ژمارەی جرجەکان بە پلەی یەکەم لە واشنتۆنی پایتەختی ئەمریکا زیاد دەبن و بەدوای ئەویشدا لە شاری سان فرانسیسکۆی ئەمریکا و تۆرنتۆی کەنەدا و نیویۆرکی ئەمریکا و ئەمستەردامی هۆڵەندا لە پلەکانی دووەم تا پێنجەمن.