پەروەردەی کەرکووک بڕیارەکەی سەرۆکی ئەنجوومەنی پارێزگا ڕەتدەکاتەوە: دەوام ئاساییە

ئاڤا نیوز

بەڕێوەبەرایەتی گشتی پەروەردەی کەرکووک بڕیارەکەی سەرۆکی ئەنجوومەنی پارێزگا ڕەتدەکاتەوە بۆ پەکخستنی دەوام دژی بڕیارێکی دادگای فیدڕاڵیی و دەڵێت، ئەمڕۆ دەوام ئاساییە.

چیرۆکی سەرەکی: دژ بە فەرمانە سالارییەکەی دادگای فیدراڵی بۆ ڕاگرتنی کارکردن بە یاسای لێبوردنی گشتی، درەنگانێکی شەوی ڕابردوو محەممەد حافز، سەرۆکی ئەنجوومەنی پارێزگای کەرکووک تاکلایەنە و بەبێ گەڕانەوە بۆ پارێزگار، پەکخستنی کاری فەرمانگەکانی پارێزگاکەی ڕاگەیاند.

ڕاگەیێنراوی فەرمی: بەڕێوەبەرایەتی گشتی پەروەردەی کەرکووک لە ڕاگەیێنراوێکدا ئەوەی خستووەتەڕوو، ئەمڕۆ چوارشەممە دەوام لەسەرجەم قوتابخانەکانی کەرکووک ئاساییە، بەتایبەتیش کە ئەمڕۆ یەکەم ڕۆژی دەوامە لەدوای کۆتاییهاتنی پشووی بەهارە کە 22ـی مانگی ڕابردوو دەستیپێکرد و دوێنێ سێشەممە پشووەکە کۆتاییهات.