پلاندانانی عێراق ئەنجامی کۆتایی سەرژمێریی ڕادەگەیێنێت

ئاڤا نیوز

وەزیری پلاندانانی عێراق ڕایگەیاند، ڕۆژی 24ـی ئەم مانگە ئەنجامی کۆتایی سەرژمێریی دانیشتووان ڕادەگەیەنن، جەختیش دەکاتەوە کە ئێستا ژمارەی دانیشتوانی وڵاتەکە گەیشتووەتە 46 ملیۆن و  122 هەزار کەس.

وێنە گەورەکە: دوای 37 ساڵ و لە 20 بۆ 22-11-2024، لە عێراق و هەرێمی کوردستان سەرژمێریی گشتیی بەڕێوەچوو و تێیدا ناوی خێزانەکان تۆمار کرا، ئەو کات ژمارەی دانیشتووانی عێراق بەهەرێمی کوردستانیشەوە، بە 45 ملیۆن و 200 هەزار کەس ڕاگەیێنرا.

لێدوانی فەرمی: محەممەد تەمیم، وەزیری پلاندانانی عێراق لە لێدوانێکدا ئاماژەی بەوەكرد:

- تێکڕای گەشەی دانیشتووان لە عێراق 2.53%ـیە و ڕێژەی ڕەگەزی نێریش لە مێ زیاترە.

- دوو لەسەر سێی دانیشتووانی عێراق لە شارەکان دەژین و ڕێژەی هەژاریی 17.5%ـە

- زۆرترین ڕێژەی هەژاریی لە پارێزگاکانی عێراق، لە پارێزگای موسەننایە و 40‎%ـی دانیشتووانەکەی هەژارن.

- لە کۆی 73 نەخۆشخانەی تەواونەکراو، ئێستا 17ـیان خراونەتەوە کار و کاریش لەوانی دیکە بەردەوامە.