تەندروستی غەززە: لەوەتەی ڕێککەوتنی ئاگربەست چووەتە بواری جێبەجێکردنەوە 92 کەس کوژراون

ئاڤا نیوز

وەزارەتی تەندروستی لە کەرتی غەززە ڕایدەگەیینێت لەوکاتەوەی ڕێککەوتنی ئاگربەست چووەتە بواری جێبەجێکردنەوە، 92 کەس کوژراون و 822 کەسی دیکە برینداربوون.

 

ڕاگەیێنراوی فەرمی: بەڕێوەبەری گشتی لە وەزارەتی تەندروستی لە غەززە لە ڕاگەیێندراوێکدا ئاماژە بۆ ئەوە دەکات، لەوکاتەوە ڕێککەوتنی ئاگربەست چووەتە بواری جێبەجێکردنەوە، "92 هاووڵاتی فەلەستینی شەهید بوونە و 822 کەسی دیکە بریندار بوون".

 

لەلایەکی دیکە: بەگوێرەی دوایین ئامارەکانی وەزارەتی تەندروستی لە کەرتی غەززە، بەهۆی پێکدادانەکانی نێوان حەماس و سوپای ئیسرائیل لە 7ی ئۆکتۆبەری 2023وە، 47 هەزار و 161 کەس کوژراون و 111 هەزار و 166 کەسی دیکەش برینداربوونە.

 

باکگراوند: ڕۆژی 15ـی 1ـی 2025، دوای 15 مانگ لە شەڕ و کوژرانی زیاتر لە دەیان هەزار کەس، ڕێککەوتنی ئاگربەست و ئازادکردنی دیلەکان بە نێوەندگیریی ئەمریکا و میسر و قەتەر لەنێوان حەماس و ئیسرائیل ڕاگەیێنرا.