12 هەزار پاسەوانی سنوور لە شوێنی نیشتەجێبوونیان زەوی وەردەگرن

ئاڤا نیوز

ماوەیەکە هەواڵی پێدانی زەوی بە سەربازانی پاسەوانی سنوور و پۆلیسی گومرگ گەرمە، چۆن و لە کوێ زەوی وەردەگرن بەناڕوونی ماوەتوە، ئێستا هەوڵێک هەیە بۆ ئەوەی لە شوێنی نیشتەجێبوونی خۆیان واتە سنووری پارێزگاکانی هەولێر، سلێمانی و دهۆک زەوی وەربگرن.

وێنە گەورەکە: 12 هەزار کەس کە لە هێزەکانی پاسەوانی سنوورن و سەر بە وەزارەتی ناوخۆی عێراقن، چوار لیوایان لە دهۆک، سۆران، سلێمانی و پێنجوێن هەیە ئەرکیان پاراستنی سنوور و گومرگەکانە، بەگوێرەی نووسراوی نوسینگەی فەرماندەی گشتی هێزە چەکدارەکانی عێراق دەبێت زەوی وەرگرن.

 

لێدوانی فەرمی: فەرماندەیەکی باڵای هێزەکانی پاسەوانی سنوور بە ئاڤای ڕاگەیاند، شاندێکی پاسەوانی سنوور لە بەغدان و لەگەڵ بەرپرسانی وەزارەتی ناوخۆی عێراق کۆدەبنەوە. ئەو فەرماندەیە دەشڵێت، ئەو شاندە لیستی سەربازانی هەولێر، دهۆک و سلێمانییان لەگەڵ خۆیان بردووە و لە دوو ڕۆژی داهاتوو بڕیاری کۆتایی لەسەر ئەو پرسە دەدرێت.

زانیاریی زیاتر: سەرەتا وابڕیاربوو لە نزیکترین پارێزگای عێراق لێیانەوە زەوی وەرگرن، بەڵام ئێستا بۆچوونەکە گۆڕاوە و  وەزارەتی ناوخۆی عێراق و هەرێمی کوردستان لەوبارەیەوە لە گفتوگۆدان.