تەرمی 20 سەرکردە و چەکداری داعش لە کەرکووک دەنێژرێن

ئاڤا نیوز

لایەنە حکومییەکان لە پارێزگای کەرکووک، تەرمی 20 سەرکردە و چەکدارای ڕێکخراوی داعش لە پارێزگاکە دەنێژن، کە لە هێرشە ئاسمانییەکانی ئەمدواییەی هێزی ئاسمانیی عێراق لە پارێزگاکە کوژرابوون.

 

وێنە گەورەکە: ڕاوەدوونانی پاشماوەکانی داعش بە دیاریکرداویش لە سنووری پارێزگای کەرکووک لەلایەن هێزە عێراقییەکانەوە بەردەوامە و لە ماوەی ڕابردووشدا چەندین سەرکردەی دیار و چەکداری ڕێکخراوەکە کوژراون، دیارترینیشیان والی کەرکووکی ڕێکخراوی داعش و دوو بەرپرسی دیکەی ڕێکخراوەکە بوو لە 8ی ئەم مانگە.

 

زانیاریی بەدەستهاتوو: سەرچاوەیەکی پزیشکی لە بەشی پزیشکی دادی کەرکووک ئەوەی بە میدیای عێراق ڕاگەیاندووە، لەلایەن لیژنەیەکی حکومییەوە 20 تەرمی سەر بە ئەندامانی داعش بەخاک سپێردراون، لەنێویاندا سەرکردەیەکی ڕێکخراوەکە کە لە هێرشە ئاسمانییەکانی هێزی ئاسمانی عێراق لە جەرگەی پارێزگاکە کوژراون.

 

زانیاریی زیاتر: بە گوتەی ئەو سەرچاوەیە، ئەم تەرمانە لەلایەن لیژنەیەک لە بەڕێوەبەرایەتی شارەوانیی کەرکووک، تەندروستیی کەرکووک، لیژنەی کاروباری ئایینی لە ئەنجوومەنی پارێزگای کەرکووک و ئەوقافەوە لە گۆڕستانی پەنجا عەلی نێژراون.