سەعدی پیرە: لووتکەی پارتی و یەكێتی پۆستە باڵاکانی حکومەت یەکلایی دەکەنەوە

ئاڤا نیوز

لەچەند ڕۆژی داهاتوو شاندی دانووستانکاری پارتی و یەکێتی، سێهەمین کۆبوونەوەی خۆیان بۆ گفتوگۆکانی پێکهێنانی حکومەت دەکەن و گفتوگۆ لەسەر ڕەشنووسی لیژنەی تەکنیکی هەردوولا و دابەشکردنی پۆستەکانی کابینەی دەیەم دەکەن، وتەبێژی یەکێتیش دەڵێت "پۆستە باڵاکانی حکومەت لە لووتکەی پارتی و یەكێتی یەکلایی دەکرێنەوە."

 

وێنە گەورەکە: پارتی و یەکێتی وەک براوەی یەکەم و دووەمی هەڵبژاردنەکانی خولی شەشەمی پەرلەمانی کوردستان، تاوەکو ئێستا دوو کۆبوونەوەیان لەسەر ئاستی باڵا لە پیرمام و دەباشان کردووە، لیژنەی تەکنیکی نێوانیشیان پێنج کۆبوونەوەیان کردووە و ڕەشنووسێکیان لەسەر دەسەڵاتی پۆستە باڵاکان و پەیکەری حکومەت ئامادەکردووە و لە کۆبوونەوەی باڵای نێوان هەردوو حیزب بڕیاری لەسەر دەدرێت، بە پێی قسەی هەردوولاش لە ڕێککەوتنی کۆتایی نزیکن.

 

لێدوانی فەرمی: سەعدی پیرە، وتەبێژی یەكێتیی نیشتمانی کوردستان بە میدیای حیزبەی ڕاگەیاندووە،  "ڕەشنووسی کۆبوونەوەکان ئامادەکراوە، هەنگاوی ئیجابیمان ناوە و لەگەڵ پارتی لەیەکەوە نزیکین بۆ پێکهێنانی حکومەت".
سەعدی پیرە ڕاشیگەیاندووە، "گفتوگۆ لەسەرکۆی پرسەکان سەبارەت بە پێکهێنانی حکومەت کراوە و پۆستەکان لە کۆبووەنەوەکانی داهاتوو گفتوگۆی لەسەر دەکرێت، لووتکەی پارتی و یەكێتی پۆستە باڵاکانی حکومەت یەکلایی دەکەنەوە".

 

لەلایەکی دیکەوە: پارتی دیموکراتی کوردستان لە ڕاگەیێنراوی کۆبوونەوەی کۆمیتەی ناوەندیدا کە بەسەرپەرشتی سەرۆک بارزانی کرا، ڕایانگەیاندووە، "لەبارەی پێکهێنانی حکومەت لێکتێگەیشتن و لێکنزیکبوونەوە دروست بووە و، لەسەر زۆر بابەتى سیاسى و ئیدارى لەگەڵ یەکێتى نیشتمانى کوردستان هاوڕایى دروست بووە و پێویستى بە گفتوگۆى زیاتر هەیە کە لەم هەفتەیەدا دەستپێدەکات و چاوەڕوانین لە کاتێکى نزیکدا موژدەى پێکهێنانى سەرۆکایەتى پەرلەمان و کابینەى نوێ لە سەر بنەماى یەک هەرێم، یەک حکومەت، یەک هێزى پێشمەرگە، ڕابگەیێنرێت".