جیهان ڕووبەڕووی دابەزینی لەناکاوی پلەی گەرمی دەبێتەوە

ئاڤا نیوز

 

دیاردەیەکی سرووشتی نائاسایی ڕوودەدات و بەشی زۆری گۆی زەوی دەگرێتەوە. دیاردەکە بریتییە لە نزمبوونەوەی پلەکانی گەرما و هاتنی سەرمایەکی زۆر سەخت کە لە زۆر شوێن بەفر و بۆران لەگەڵ خۆیدا دێنێت. 

 

زانیاریی بەدەستهاتوو: شارەزایانی کەشناسی هۆکاری ئەم سەرمایە بۆ گەردەلوولی سەرمای جەمسەرەکان دەگەڕێننەوە کە دزە دەکات و لە شوێنی خۆی دەترازێت و دەگاتە زۆر شوێنی دیکە و کاریگەریی دەبێت.

 

لێدوانی فەرمی: شێخ دارا، پێشکەشکاری کەشوهەوا لە ئاڤا میدیا، ڕایگەیاند: بەفر و بارانبارین لەسەرجەم ناوچەکان دەبارێت، مەترسی دروستبوونی لافاو لە سەرجەم شارەکان دەبێت، هاوکات ئەگەری بەردەوامی شەپۆلەکەش هەیە.

 

زانیاریی زیاتر: گەردەلوولی سەرمای جەمسەر بریتییە لە خولانەوەی ڕەشەبا و سەرمای بە خێراییەک کە زیاترە لە 50 کیلۆمەتر لە کاتژمێرێکدا و لە وەرزی زستاندا سەرماکەی دەگاتە ئەوپەڕی و زۆر جار لە شوێنی خۆی کە جەمسەرەکانی زەوییە دەترازێت و دەگاتە شوێنی دیکەش. 

 

ئەوەی پێویستە بیزانیت: بەشێک لە وڵاتانی ئەمریکا و ئەوروپا هۆشدارییان لە شەپۆلی سەرماکە داوە و ڕایانگەیاندووە کە سەرمایەک دەبێت لە چەند دەیەی ڕابردوودا وێنە نەبووە، بۆیە ڕێکاری پێویستیان گرتووەتە بەر و داوایان لە هاووڵاتیانیان کردووە خۆیانی بۆ ئامادە بکەن. 

 

گۆشەیەکی دیکەی دیمەنەکە: کاریگەرییەکانی شەپۆلی سەرماکە هەروەها گەیشتووەتە چەند وڵاتێکی ئاسیایی و چاوەڕێش دەکرێت کاریگەریی لەسەر کەشوهەوای هەرێمی کوردستان هەبێت.