پارێزگاری هەڵەبجە لە ئەرکەکەیدا بەردەوام دەبێت

ئاڤا نیوز

بەڕێوەبەری گشتیی دیوانی وەزارەتی ناوخۆ  ڕایدەگەیێنێت، ئازاد تۆفیق، پارێزگاری هەڵەبجە تا دەرچوونی فەرمانی هەرێمی بۆ کەسێکی دیکە، لە پۆستەکەیدا دەمێنێتەوە.

وێنە گەورەکە: زیاتر لە مانگێک بوو بەهۆی خانەنشینبوونی پارێزگاری هەڵەبجە و جێگرەکەی، کاروباری هاووڵاتییان لەو پارێزگایە سست ببوو، ماوەیەکە ئازاد تۆفیق گەڕاوەتەوە سەر ئەرکەکەی بۆ ڕاییکردنی کاروبارەکانی خەڵک.

لێدوانی فەرمی: هێمن میرانی، بەڕێوەبەری گشتیی دیوان لە وەزارەتی ناوخۆ بە ئاڤای گوت،

- "ئازاد تۆفیق وەکو پارێزگاری هەڵەبجە لە پۆستەکەی بەردەوام دەبێت، تاوەکو مامەڵەی خانەنشینبوونی تەواو دەبێت و فەرمانی هەرێمی بۆ کەسێکی دیکە و وەک شوێنگرەوەی ئەو دەردەچێت."

- تاوەکو ئێستا هیچ سیڤییەک بۆ شوێنگرەوەی ئازاد تۆفیق پێشکەش نەکراوە.

- دانانی پارێزگاری نوێ بۆ پۆستەکە لە پشکی یەکێتییە و تاوەکو ئێستا لەسەر دیاریکردنی کەسێک یەکلایی نەبووەتەوە، دوای ئەوەی لەسەر کەسێک یەکلابوونەوە ناوەکەی پێشکەش دەکەن.