مستەفا کازمی: بەشێک لە بەرپرسانی بەغدا شۆڤێنیانە لە کورد دەڕوانن

ئاڤا نیوز

 

سەرۆکوەزیرانی پێشووی عێراق دەڵێت، "بەداخەوە جۆرێک لە تێڕوانینی شۆڤێنی بەرامبەر بە کورد، لەلای بەشێک لە بەرپرسانی بەغدا هەیە."

 

چیرۆکی سەرەکی: لەمیانی بەشداریکردنی لە دیدارێکی تەلەفزیۆنی لە یەکێک لە میدیا عێراقییەکان، مستەفا کازمی، سەرۆکوەزیرانی پێشووی عێراق باسی لە چەند پرسێکی هاوبەشی پەیوەست بە هەرێمی کوردستان و عێراق کرد.

 

لێدوانی فەرمی: مستەفا کازمی ڕایگەیاند، هەرێمی کوردستان لە زۆر سێکتەردا سەرکەوتوو بووە، لەوانەش پەروەردە و ژێرخان و فەراهەمکردنی ئامرازەکانی خۆشگوزەرانی، کەچی پارێزگاکانمان لە پاشەکشەدان.

 

زانیاریی زیاتر: سەرۆکوەزیرانی پێشووی عێراق ئاماژەی بەوەکرد، سیستمی فیدڕاڵی کە لە دەستوور چەسپاوە ئەو مافە بە کورد دەدات کە خۆیان بەشێک لە کاروبارە ئیداری و سیاسییەکان بەڕێوە ببەن، بەداخەوە جۆرێک لە بەکەم سەیرکردن و تێڕوانینی شۆڤێنی لەلای بەشێک لە بەرپرسانی عێراق بەرامبەر بە کورد هەیە کە پێویستە ئەمجۆرە بیرکردنەوە نەهێڵدرێت.

 

ئەوەش بزانە: کازمی بەپێویستی دەزانێت، بەغدا و هەرێمی کوردستان پەیوەندییەکانیان لەسەر بنەمای نیەت پاکی و متمانە بوونیاد بنێنەوە.