سەرۆك بارزانی لەگەڵ سێ پارتی باكوور پرۆسەی ئاشتی تاوتوێ دەکات

ئاڤا نیوز

سەرۆک بارزانی لەگەڵ شاندێكی هاوبەشی سێ پارتی باكووری كوردستان تاوتوێی پڕۆسەی ئاشتی لە توركیا و كاریگەرییەكانی لەسەر دۆزی كورد کرد و جەختیشی لە پاڵپشتیكردنی پڕۆسەکە کردەوە.

وێنە گەورەکە: ئەمڕۆ دووشەممە 3-3-2025، سەرۆك مەسعود بارزانی پێشوازی لە شاندێكی هاوبەشی سێ پارتی باكووری كوردستان كرد كە پێكهاتبوو لە مستەفا ئوزچەلیك، سەرۆكی پارتی وڵاتپارێزانی كوردستان و بایرام بۆزیەل، سەرۆكی پارتی سوسیالیستی كوردستان و دۆزگین كاپلان، سەرۆكی پارتی ماف و ئازادییەكان و مەسعود تەك، جێگری سەرۆكی پارتی سۆسیالیستی كوردستان و محەمەد شیرین تەیمور، لە پارتی ماف و ئازادییەكان.

ڕاگەیێنراوی فەرمی: بارەگای بارزانی ڕایگەیاند، لە دیدارەکەدا:

- بە وردی بیروڕا لەبارەی پڕۆسەی ئاشتی لە توركیا و كاریگەرییەكانی لەسەر كۆی پڕۆسەی سیاسی و دۆزی كورد لە ناوچەكە ئاڵوگۆڕ كرا.

- جەخت لە پاڵپشتیكردنی پڕۆسەی ئاشتی و گەیشتن بە چارەسەر لە توركیا كرایەوە.

- باس لە دوایین گۆڕانكارییە سیاسی و ئەمنییەكانی ناوچەكە و بە تایبەت سووریا کرا.

- سەرۆك بارزانی بەرچاوڕوونیی پێویستی بۆ شاندی میوان لەبارەی بارودۆخ و دواڕۆژی كورد و دەرفەت و هەڕەشەكان خستەڕوو.