بۆمبێکی جەنگی دووەمی جیهانی لە قەرەباڵغترین وێستگەی شەمەندەفەری فەرەنسا دۆزرایەوە

ئاڤا نیوز

ئەمڕۆ هەینی بەهۆی دۆزینەوەی بۆمبێکی جەنگی دووەمی جیهانی هاتووچۆ لە وێستگەی شەمەندەفەری "گار دو نۆرد" لە پاریسی پایتەختی فەرەنسا ڕاگیرا.

چیرۆکی سەرەکی: بۆمبە نەتەقیوەکەی جەنگی دووەمی جیهانی لە ناوەڕاستی ڕێڕەوەکانی شەمەندەفەر بە دووری نزیکەی 2.5 کیلۆمەتر لە وێستگەی "گار دو نۆرد" لە شەودا دۆزراوەتە کە لەوکاتەدا کاری نۆژەنکردنەوە لەو ڕێڕەوەدا دەکرا.

لێدوانی فەرمی: فیلیپ تابارۆت وەزیری گواستنەوە و گەیاندنی فەرەنسا ڕایگەیاند، هۆشداری دەدەن لەوەی هاتووچۆی شەمەندەفەر لە وێستگەی "گار دو نۆرد" پەکی کەوتووە، بە زۆری گەشتەکانی لە ڕۆژی هەینیدا لە ڕۆژەکانی دیکە زیاتر دەبن، داوا دەکەین گەشتیاران نەچنە وێستگەکە و گەشتەکانیان دوابخەن.

ئەوەی پێویستە بیزانیت: وێستگەی "گار دو نۆرد" دەکەوێتە باکووری پاریسی پایتەختی فەرەنسا و قەرەباڵغترین ناوەندی شەمەندەفەری وڵاتەکەیە، جگە لە خزمەتگوزاری لە ناوەوە و دەرەوەی پاریس، هاوکات وێستگەی هاتووچۆی شەمەندەفەرەکانی وڵاتانی ئەوروپاشە، بەپێی ئامارەکان، ڕۆژانە نزیکەی 700 هەزار سەرنشین لەڕێگەی ئەم وێستگەیەوە دەگوازرێنەوە.

ئەمەش بزانە: ئەم جۆرە ڕووداوە یەکەمجار نییە لە پاریسی پایتەختی فەرەنسا ڕوودەدات و پێشتریش دۆزینەوەی بۆمبی جەنگی دووەمی جیهانی هاتووچۆی شەمەندەفەریان پەکخستووە.