گرژی و ئاڵۆزی گەیشتە حەلەب و هێرش دەکرێتە سەر گەڕەکە کوردییەکان

ئاڤا نیوز

هێزەکانی سووریای دیموکرات بەرپەرچی هێرشێکی گرووپە چەکدارەکانی سەر بە حکومەتی کاتی سووریا لە گەڕەکی شێخ مەقسوودی کوردنشین لە شاری حەلەب دەدەنەوە و کوژراو و بریندار هەیە.

وێنە گەورەکە: چەند ڕۆژێکە بەتایبەت لە هەردوو پارێزگای لازقیە و تەرتووسی عەلەوینشین شەڕ و پێکدادان لەنێوان پاشماوەکانی ڕژێمی بەشار ئەسەد و هێزەکانی سەر بە ئەحمەد شەرع سەریهەڵداوە و تا ئێستا هەزار و 311 کەس کوژراون، ئەمڕۆش لە شاری حەلەب هێرشێک کرایە سەر گەڕەکی شێخ مەقسوودی کوردنشین.

ئەوەی پێویستە بیزانیت: هەردوو گەڕەکی شێخ مەقسوود و ئەشرەفیە لە شاری حەلەب لە سەردەمی ڕژێمی پێشووی سووریا و حکومەتی ئێستاش هەر لەژێر دەسەڵاتی هێزە کوردییەکان (هەسەدە و یەپەگە)دان.

زانیاریی بەدەستهاتوو: بەگوێرەی میدیای نزیک لە هەسەدە، ئێوارەی ڕۆژی یەکشەممە 2025-03-09، گرووپە چەکدارەکانی سەر بە ئەحمەد شەرع هێرشێکیان کردووەتە سەر خاڵەکانی هێزەکانی پاراستنی شێخ مەقسوود، هێزە کوردییەکانیش بەرپەرچی هێرشەکەیان داوەتەوە، بەگوێرەی ئامارە سەرەتاییەکان شەش چەکداری هێرشکاران کوژراون و چوار ئەندامی هێزە کوردییەکانیش بریندار بوون.