فوئاد حوسێن: نەبوونی سەقامگیری لە سووریا کاریگەری نەرێنی لەسەر دۆخی عێراق دەبێت

 

ئاڤا نیوز

بە پێی گوتەی وەزیری دەرەوەی عێراق، نەبوونی سەقامگیری لە سووریا کاریگەری نەرێنی لەسەر دۆخی عێراق دەبێت و دەشڵێت سەقامگیری لە سووریا پێویستی بە کردنەوەی دەرگای دیالۆگە لەگەڵ سەرجەم پێکهاتە جیاوازەکانی ئەو وڵاتە.

چیرۆکی سەرەکی: ڕۆژی یەکشەممە 2025-03-09، کۆبوونەوەی وەزیرانی دەرەوە و بەرگری و سەرۆکی دەزگای هەواڵگری نیشتتیمانی وڵاتانی ئوردن، عێراق، سوریا و تورکیا لە عەممانی پایتەختی ئوردن بەڕێوەچوو. دوای کۆتاییهاتنی کۆبوونەوەکەش کۆنگرەیەکی ڕۆژنامەوانی هاوبەشیان ئەنجامدا.

لێدوانی فەرمی: فوئاد حوسێن، وەزیری دەرەوەی عێراق ڕایگەیاند: داعش خەریکە خۆی بەهێز دەکاتەوە، جموجۆڵەکانی لەسەر سنووری نێوان سووریا و عێراق  و سووریا و ئوردن و لەنێو خودی سووریاش زیاتر بووە، بۆیە کارکردن بۆ ڕووبەڕووبوونەوەی داعش تەنیا پێویستی بە هەوڵی سووریا نییە، بەڵکو پێویستی بە هاوکاری ناوچەیی و نێودەوڵەتی و گۆڕینەوەی زانیاریی هەواڵگریی هەیە.

بەشێکی دیکە لە قسەکانی وەزیری دەرەوەی عێراق:

٠ ئەوە ڕوونە کە سەقامگیریی عێراق لە سەقامگیریی سووریاوە سەرچاوە دەگرێت، نەبوونی سەقامگیری لە سووریا کاریگەری نەرێنی لەسەر دۆخی عێراق دەبێت، بۆیە عێراق لەو ڕووەوە گرنگییەکی زۆر بە بابەتی ئاسایش و سەقامگیری لە سووریا دەدات.

٠ سەقامگیری لە سووریا پێویستی بە کردنەوەی دەرگای دیالۆگ هەیە لەگەڵ سەرجەم پێکهاتە جیاوازەکانی ئەو وڵاتە.