لە پارکێکی هەولێر بە نهێنی کڕین و فرۆشتن بە چەکەوە دەکرێت

ئاڤا نیوز

ئەگەر چی کڕین و فرۆشتنی چەک قەدەغەیە و تەنانەت بازاڕی چەک فرۆشانیش داخراوە، بەڵام لە یەکێک لە پارکەکانی هەولێر چەکی بێ مۆڵەت مامەڵەی پێوە دەکرێت.

وێنە گەورەکە: لە شەقامی 100 مەتری هەولێر، دوای عەسران خەڵک لە پارکێکی بچووک کۆدەبنەوە و لەوێ کڕین و فرۆشتن بە چەکەوە دەکەن، پارکەکە وەکو بازاڕی چەکفرۆشانی لێهاتووە و هەر کەسێک بچێتە ئەو شوێنە، دەزانرێت بۆ چەککڕین چووەتە ئەوێ. دوکاندارێکی ئەو ناوە دەڵێ، جگە لە چەکی بچووک  ئاڕپیجیش دەفرۆشرێت.

لێدوانی فەرمی: مام حاجیەک لە پارکەکە دوکانێکی هەیە و دەڵێ،

- لەم پارکە جۆرەها چەک دەفرۆشرێن، بۆنموونە دەمانچە کە بەنهێنی پشانی یەکتری دەدەن و بە نرخێکی هەرزانیش مامەڵەی پێوە دەکەن.

- دەرکەوتووە ئەم چەکانەی لەم پارکە بچووکە کڕین و فرۆشتنیان پێوە دەکرێت، لە وڵاتانی دراوسێوە بە قاچاخ دێنە هەرێمی کوردستان.

لەلایەکی دیکەوە: کارزان ئەمیر، وتەبێژی پۆلیسی گشتی هەرێمی کوردستان بۆ ئاڤا دەڵێ،  ئەمساڵ چەکی بێ مۆڵەت زۆر کەمی کردووە، بەهەمان شێوە تاوانەکانیش کەمی کردووە، هاوکات لە ساڵی 2022یشەوە کە یاسای چەک دەرچووە، تا ئێستا زیاتر لە 17 هەزار چەک تۆمار کراون.