مەشهدانی هەڕەشەی ڕاگرتنی مووچەی پەرلەمانتاران دەکات

ئاڤا نیوز

بەهۆی یاسایەکی تایبەت بە خانەنشینی حەشدی شەعبی، پەرلەمانتارانی شیعە چەند هەفتەیەکە بایکۆتی دانیشتنەکانی پەرلەمانیان کردووە و کۆبوونەوەکانیان پەکخستووە، لەبەرامبەردا سەرۆکی پەرلەمان هەڕەشەی ڕاگرتنی مووچەکانیان دەکات.

چیرۆکی سەرەکی: پەرلەمانی عێراق شەش هەفتەیە هیچ کۆبوونەوەیەکی نەکردووە، دوایین کۆبوونەوەی ڕۆژی 2ی شوبات بوو کە تیایدا هەمواری یاسای بودجەی بەمەبەستی دەستپێکردنەوەی هەناردەی نەوتی هەرێمی کوردستان پەسەندکرد، بەشێک لە پەرلەمانتارانی شیعە بەهۆی ئەوەی پڕۆژەیاسای خزمەت و خانەنشینی حەشدی شەعبی لە بەرنامەی کاردا نییە، شەش هەفتەیە نایەنە کۆبوونەوەکان و بەوەش نیسابی یاسایی بۆ دانیشتن نەبووە، بەشێکی دیکەی پەرلەمانتارانیش دەڵێن، بەو ڕەمەزانە توانای بەشدارییکردنیان لە کۆبوونەوەکاندا نییە و ناچنە پەرلەمان.

لێدوانی فەرمی: مەحموود مەشهدانی، سەرۆکی پەرلەمانی عێراق لە چاوپێککەوتنێکدا ڕایگەیاند،

- بەهۆی پەککەوتنی دانیشتنەکانی پەرلەمانەوە، بیر لەوە دەکاتەوە مووچەی سەرۆکایەتیی و هەموو پەرلەمانتاران ڕابگرێت، پرسیاری ئەوەشی کرد کە "ئەگەر پەرلەمانتاران کار نەکەن، بۆچی دەبێت مووچە وەربگرن؟".

- کار دەکات بۆ ئەوەی مەرجەعییەتی شیعە و ئەنجوومەنی فتوا و زانایانی سوننە، فەتوایەک دەربکەن و مووچەی پەرلەمانتاران بە حەرام لە قەڵەم بدەن ئەگەر هیچ کارێک نەکەن.