دادگا بڕیاری دەستگیرکردنی بۆ ئەکرەم ئیمامئۆغلو دەرکرد

ئاڤا نیوز

 

ئەکرەم ئیمامئۆغلو، سەرۆکی گەورە شارەوانی ئیستەنبووڵ دوای دوو کاتژمێر لێكۆڵینەوە لەلایەن دادگای ئیستەنبووڵەوە، بە تۆمەتی" گەندەڵی" بڕیاری دەستگیرکردنی بۆ دەرکرا.

چیرۆکی سەرەکی: بەرەبەیانی ئەمڕۆ یەکشەممە، ئەکرەم ئیمامئۆغلو لەگەڵ 90 کەسی دیکە سەر بە جەهەپە لە دادگای ئیستەنبووڵ دادگایی کران. پرۆسەی دادگاییکردنەکە دوو کاتژمێری خایاند. ئیمامئۆغلو سەرجەم ئەو تۆمەتانەی دراوەتە پاڵی، ڕەت کردووەتەوە. بەڵام داواکاری گشتیی داوای دەستگیرکردنی پێشکەش بە دادگا کرد و دادگاش بڕیاری دەستگیرکردنی بۆ ئیمامئۆغلو و  20 کەسی دیکە دەرکرد. 

 

لەپاڵ ئەوەشدا: ئیمامئۆغلو، لەسەر "تۆمەتی هاوکاریکردنی تیرۆر" بێتاوان دەرچوو، دادگا بە مەرجی "کۆنترۆڵکردنی دادوەری" بڕیاری ئازادکردنی بۆ دەرکرد. 

 

زانیاریی بەدەستهاتوو: لەنێو دەستگیرکراوەکان، تونجای یڵماز و مورات ئۆلگون، عەلی نوح ئۆغلو هەن، ڕاوێژکار و بەرپرسانی دارایی و نزیکەکان و سەرۆکانی ڕێکخراوەکەی ئیمامئۆغلون. ئەوانیش بە تۆمەتی وەرگرتنی بەرتیل و گەندەڵیکردن دەستگیرکراون.

 

باکگراوند: پێشتر ئەکرەم ئیمامئۆغڵو، سەرۆکی شارەوانی گەورەی ئیستەنبووڵ لە گرتەیەکی ڤیدیۆییدا ڕایگەیاند، کاندیدی جەهەپەیە بۆ هەڵبژاردنی سەرۆکایەتیی کۆماری تورکیا؛ دوای ئەو ڕایگەیێنراوە، لە 18ی ئادار بەتۆمەتی ساختەکردنی بڕوانامەکەی، زانکۆی ئیستەنبووڵ بڕوانامەکەی ناوبراوی هەڵوەشاندەوە و هاوکات بەرەبەیانی 19ی ئادار لە ئۆپەراسیۆنێکدا لەلایەن هێزە ئەمنییەکانی تورکیا ئیمامئۆغڵو دەستبەسەرکرا.