مەسرور بارزانی: زۆر دڵتەنگم بۆ ئەوانەی لە بوومەلەرزەکەی میانمار و تایلەند گیانیان لەدەستدا

ئاڤا نیوز

لە هەژماری فەرمی خۆی لەسەر تۆڕی ئێکس، سەرۆکوەزیران مەسرور بارزانی هاوخەمی و دڵتەنگی خۆی دەربڕیووە بۆ ئەوانەی بە هۆی بوومەلەرزەکەی ئەمڕۆی تایلەند و میانمار گیانیان لەدەستدا.

وێنە گەورەکە: بوومەلەرزە یەکێکە لە ڕووداوە سروشتییەکان و ئەو وڵاتانەی دەکەونە سەر هێڵی بوومەلەرزە، کاریگەرییەکانیان بە ڕوودانی بوومەلەرزە زیاتر دەبێت، زیانیان زۆرتر دەبێت.

لێدوانی فەرمی: مەسرور بارزانی، سەرۆکوەزیرانی هەرێمی کوردستان لەسەر تۆڕی ئێکس نووسیویەتی، "زۆر دڵتەنگ و نیگەرانم بە ڕوودانی ئەو بوومەلەرزەیەی  میانمار و تایلەندی گرتەوە و ژمارەیەک کەس گیانیان لەدەستدا، سەرەخۆشی خۆم ئاراستەی بنەماڵەی ئەوانە دەکەم گیانیان لەدەستدا و هیوای زوو چاکبوونەوەش بۆ بریندارەکان دەخوازم."

ئەوەی پێویستە بیزانیت: بەیانی ئەمڕۆ هەینی بوومەلەرزەیەکی بەهێز بەگوڕی 7.7 میانمار و تایلەندی هەژاند، بەو هۆیەوە زیاتر لە 144 کەس گیانیان لەدەستدا، 732 کەسی دیکەش برینداربوون، سەدان خانوو و باڵەخانە بەو هۆیەوە ڕووخان و خزمەتگوزارییەکانی گواستنەوەی گشتی وەستان.