بەرپرسانی کۆشکی سپی لە پۆستەکانیان دووردەخرێنەوە

ئاڤا نیوز

 

ژمارەیەک ئەندامی ئەنجوومەنی ئاسایشی نیشتمانیی ئەمریکا لە پۆستەکانیان دوورخرانەوە، میدیاکانی ئەمریکاش دەڵێن، گومانەکان لەسەر ئەوەن پەیوەندییان بە گرووپ چاتەکەی بەرپرسانی ئەمریکا بێت کە تیایدا باسیان لە پلانی هێرشەکانی سەر بە حووسییەکان کردبوو.

 

بۆچی گرنگە: دوای ڕۆژێک لە سەردانی لاورا لوومەر، چالاکوانی ڕاستڕەوی توندڕەوی ئەمریکی بۆ کۆشکی سپی و کۆبوونەوەی لەگەڵ دۆناڵد ترەمپ، ژمارەیەک ئەندامی ئەنجوومەنی ئاسایشی نیشتمانیی ئەمریکا لە پۆستەکانیان دوورخرانەوە.

 

زانیاریی زیاتر: بەپێی سەرچاوەیەکی ئاگادار لە بابەتەکە کە نەیویستووە ناوی ئاشکرا بکرێت بە سی ئێن ئێنی ئەمریکی ڕاگەیاندووە، لاورا لوومەر لە کۆشکی سپی داوای لە ترەمپ کردووە ژمارەیەک ئەندامی ئەنجوومەنی ئاسایشی نیشتمانی لە پۆستەکانیان دووربخاتەوە، چونکە ئەو کەسانە ناپاکن.

 

لەلایەکی دیکەوە: سەرچاوەیەک لە کۆشکی سپی بۆ ئەکسیۆسی ئەمریکی ئەوەی ئاشکراکردووە، چەند کەسێک لە کۆشکی سپی لە کارەکانیان دوورخراونەتەوە، کە ئەگەری هەیە ژمارەیان بگاتە 10 کەس، لەنێویاندا بەرپرسی باڵای ئەمریکا هەن.