ئێران: ئامادەیین بۆ دانووستاندن لەسەر بەرنامە ئەتۆمییەکەمان

ئاڤا نیوز

 

ڕۆژی یەکشەممە، دوای هەڕەشەکانی دۆناڵد ترەمپ، سەرۆکی ئەمریکا، وەزیری دەرەوەی ئێران ئامادەیی ئێرانی بۆ دانووستاندن لەسەر بەرنامە ئەتۆمییەکەیان ڕاگەیاند.

 

وێنە گەورەکە: ڕۆژی یەکشەممە 6-4-2025، سەرەڕای هەڕەشە و پەرەسەندنی ئاڵۆزییەکانی نێوان ئێران و ئەمریکا، عەباس عێراقچی وەزیری دەرەوەی ئێران پابەندبوونی وڵاتەکەی بە دانووستان دووپاتکردەوە.

 

لێدوانی فەرمی: عەباس عێراقچی وەزیری دەرەوەی ئێران ڕایگەیاند: ''وەڵامی تاران بۆ پەیامەکەی دۆناڵد ترەمپ، سەرۆکی ئەمریکا لەگەڵ ناوەڕۆکەکەیدا یەکدەگرێتەوە و دەرفەتی دیپلۆماسی پاراستووە، بەڵام دانووستانی ڕاستەوخۆ لەگەڵ لایەنێک هەڕەشەی بەکارهێنانی هێز بکات، هیچ سوودێکی نییە''

 

بەتەنیشت ئەم بابەتەوە: دوێنێ مەسعود پزیشکیان، سەرۆککۆماری ئێران ئامادەیی وڵاتەکی بۆ دانووستان لەگەڵ ئەمریکا ڕاگەیاند، بەڵام بەبێ بوونی هەڕەشەیەک بۆ سەر وڵاتەکەی.

 

زانیاریی زیاتر: ئەم لێدوانانە دوای ئەوە دێن کە  تاران لە چەند ڕۆژی ڕابردوودا ڕایگەیاند، وەڵامی نامەکەی ترەمپیان داوەتەوە، بەوەی ئێران ئامادەیە دانووستانی ناڕاستەوخۆ لەگەڵ ئەمریکا لە ڕێگەی وڵاتی سێیەمەوە ئەنجام بدات.

 

ئەوەی پێویستە بیزانیت: هەوڵەکانی ئەمریکا بۆ دانوستاندن و ڕێککەوتن لەگەڵ ئێران بۆ ئەوەیە کە ئێران دەستبەرداری بەرنامە ئەتۆمییەکەی بێت، کە ئەمریکا بە هەڕەشە بۆ سەر خۆیی و تەواوی جیهان دەیبینێت.