گۆڕینی ناوی پردەکەی خورماتوو دەبردرێتە لای پارێزگاری سەڵاحەددین

ئاڤا نیوز

 

ئەندامێکی ئەنجوومەنی پارێزگای سەڵاحەددین زمانی کوردی لەسەر تابلۆی پردی نێوان کەرکووک - بەغدا لە خورماتوو لاداوە و ڕێگری لەو کەسانە دەکات کە هەوڵی دانانەوەی دەدەن، کوردیش لە شارەکە دەڵێت؛ قبووڵی ناکەین و دەبێت ناوێک بێت هەمووان لەسەری کۆک بن.

 

چیرۆکی سەرەکی: تابلۆی پردی نێوان کەرکووک - بەغدا کە دەکەوێتە خورماتوو، لەلایەن عاتف نەجاڕ، ئەندامی ئەنجوومەنی پارێزگای سەڵاحەددین کە تورکمانە و سەر بە ڕێکخراوی بەدرە، تاکڕەوانە هەڵساوە تابلۆکەی گۆڕیوە، پێشتر بە زمانەکانی کوردی، ئینگلیزی، عەرەبی و تورکمانی بوو، ئێستا تەنیا تورکمانی هێشتووەتەوە.

 

لێدوانی فەرمی: بورهان جومعە، بەرپرسی مەکتەبی هەڵبژاردنی یەکێتی لە سەڵاحەددین بە ئاڤای گوت، "لەڕێگەی پارێزگاری شارەکە لەسەر هێڵین و جەختمان لەوە کردووەتەوە کە بەشێوازێک ئەو تابلۆیە بنووسرێت کە هەمووان لەسەری کۆک بن نەک بەدڵی لایەنێک بێت کە کەمینەن لە ناوچەکە."

 

زانیاریی زیاتر: ئەنجوومەنی پارێزگای سەڵاحەددین لە 15 کورسی پێکدێت و کورد خاوەنی یەک کورسی ئەو پارێزگایەیە، کە بەر یەکێتی کەوتووە.