ئەمریکا ژمارەیەک باڵیۆزخانە و کونسوڵخانەی وڵاتەکەی دادەخات

ئاڤا نیوز

 

لە چوارچێوەی کەمکردنەوەی خەرجییەکانی وەزارەتی دەرەوە، ئەمریکا دەیەوێت ژمارەیەک باڵیۆخانە و کونسووڵگەری لە وڵاتانی جیهان دابخات.

 

وێنە گەورەکە: ئیدارەی ترەمپ دەیەوێت خەرجییەکانی بۆ ڕێکخراوە نێودەوڵەتییەکان و نوێنەرایەتییە دیپلۆماسییەکانی لە سەرانسەری جیهان و زۆرێک لە بەرنامەکانی دیکەی وڵاتەکەی کەمبکاتەوە یان ڕایبگرێت.

 

ڕاگەیێنراوی فەرمی: ڕۆژنامەی واشنتن پۆستی ئەمریکی بە پشت بەستن بە بەڵگەنامەکانی نووسینگەی بەڕێوەبردن و بودجەی کۆشکی سپی بڵاویکردووەتەوە، بودجەی پێشبینیکراوی وەزارەتی دەرەوەی ئەمریکا بۆ ساڵی 2026 دەبێتە 28.4 ملیار دۆلار، بەمەش بە ڕێژەی 48% کەمتر دەبێت لەو بودجەیەی لە ساڵی 2025 بۆی دیاری کراوە.

ئەوەش بزانە: ڕەنگە ئەمریکا نزیکەی 10 باڵیۆزخانە و چەندین کونسوڵخانەی لە سەرانسەری جیهان دابخات، بەتایبەتی لە وڵاتی ئێریتریا، لۆکسمبۆرگ، باشووری سودان و ماڵتا، هەروەها پێنج لەو کونسوڵخانانە لە فەرەنسا و دوو کونسوڵخانە لە ئەڵمانیان. 

 

باکگراوند: ئیدارەی ترەمپ پێشتر 83%ی بەرنامەی هاوکارییەکانی ئەمریکای کەمکردەوە، کە بودجەی ساڵانەیان 42.8 ملیار دۆلار بوو، کە دەکاتە 42%ی هاوکارییە مرۆییەکان کە لە سەرانسەری جیهاندا لەلایەن ئەمریکاوە دابین دەکرێن.