شەرع پەیامی هاوخەمی بۆ کۆچی دوایی پاپا ئاراستەی ڤاتیکان دەکات

ئاڤا نیوز

ئەحمەد شەرع، سەرۆککۆماری سووریا، لە ڕاگەیێنراوێکدا بەهۆی کۆچی دوایی پاپا فرانسیس، پاپای ڤاتیکان، پرسە و سەرەخۆشی ئاراستەی ڤاتیکان دەکات.

چیرۆکی سەرەکی: ڕۆژی دووشەممە 2025-04-21، پاپا فڕانسیس، پاپای ڤاتیکان و ڕێبەری کاسۆلیکەکانی جیهان، لە تەمەنی 88 ساڵیدا بەهۆی جەڵتەی مێشک و سستی دەمارەکانی دڵییەوە کۆچی دوایی کرد، بەهۆیەوە وڵاتانی جیهان سەرەخۆشی خۆیان ئاراستەی ڤاتیکان کرد.

ڕاگەیێنراوی فەرمی: ڕۆژی پێنجشەممە 2025-04-25، لە ڕاگەیێنراوێکدا ئەحمەد شەرع، سەرۆککۆماری سووریا ڕایگەیاند:  "بەدرێژایی ساڵان، پاپا فرانسیس لە تاریکترین کاتەکاندا لە تەنیشت گەلی سووریاوە وەستاوە، و بەردەوام دژی ئەو توندوتیژی و نادادپەروەرییە بووە کە دەرهەق بە  گەلی سووریا کراوە ".

زانیاریی زیاتر: پاپا فرانسیس لە ماوەی ژیانی دا چەندین جار ئیدانەی کۆمەڵکوژی و دەستدرێژییەکانی رژێمی پێشووی سووریای دژی خەڵکی سڤیلی سووریای کردووە.

لە لایەکی دیکەوە: ڤاتیکان ڕایگەیاند، ڕۆژی چوارشەممە نزیکەی 20 هەزار کەس ماڵئاواییان لە تەرمی پاپا فرانسیس کردووە و تەرمەکەی گواستراوەتەوە بازلیکا سانت پیتەر لە ڕۆما و بڕیارە شەممەی داهاتوو بە خاک بسپێردرێت.