جێگرەکەی ترەمپ بۆ ڕووسیا و ئۆکراینا: بە پێشنیازەکانمان ڕازی نەبن لە گفتوگۆی ئاشتی دێینە دەرەوە

ئاڤا نیوز

 

لە وەڵامی پێشنیازێکی ئەمریکا بۆ ئۆکراینا، کیێڤ ڕەتیدەکاتەوە بەفەرمی دان بەوەدا بنێت کە نیمچە دورگەی کریمیا ببێتە بەشێک لە ڕووسیا. لەبەرامبەردا ئەمریکا هۆشداری دەدات کە پێویستە هەردوولا بە پێشنیازی ئەمریکا ڕازی ببن.

 

وێنە گەورەکە: دوای پێشنیازەکەی ئەمریکا بۆ ڕاگرتنی شەڕی نێوان ڕووسیا و ئۆکراینا کە تیادا داوای لە ئۆکراینا کردووە لەبەرامبەر ڕاگرتنی شەڕ دان بە سەروەریی ڕووسیا بەسەر کریمیادا بنێت، هاوکات واز لە داخوازی بەئەندامبوونی خۆی لە ناتۆ بهێنێت؛ ئۆکرایناش ئەمە ڕەتدەکاتەوە.

 

لێدوانی فەرمی: جەی دی ڤانس، جێگری سەرۆکی ئەمریکا ڕایگەیاند، کاتی ئەوە هاتووە ڕووسیا و ئۆکراینا یان بە پێشنیازی ئاشتی ئەمریکا ڕازی بن یان ئەمریکا لەم پرۆسەیە دوور بکەوێتەوە.

 

زانیاریی بەدەستهاتوو: ڤۆلۆدیمیر زێلێنسکی، سەرۆکی ئۆکراینا بەرامبەر ئەم مەرجانەی ئەمریکا هەڵوێستی وەرگرتووە، لە بەرامبەر ئەمەشدا ترەمپ دەڵێت، ڕەتکردنەوەی هەر مەرجێکی ئەمریکا زیانی بۆ دانوستاندنەکانی ئاشتی دەنێت و هۆشداریش بە ئۆکراینا دەدات لەوەی یان دەتوانێت ئاشتی هەڵبژێرێت، یاخوود دەتوانێت بۆ سێ ساڵی دیکە شەڕ بکات و هەموو وڵاتەکە لەدەست بدات.