لە مانگی ڕابردووەوە تائێستا ئەمریکا 650 چەکداری حووسیەکانی کوشتووە

ئاڤا نیوز

 

لە مانگی ڕابردووەوە ئۆپەراسیۆنە سەربازییە ئاسمانییەکانی ئەمریکا بۆ سەر پێگە و بارەگاکانی حووسییەکان یەمەن بەردەوامە و بەهۆیەوە سەدان ئەندامی ئەو گرووپە کوژراون.

 

وێنە گەورەکە: ڕۆژی 18-3-2025، ئەمریکا  بە فەرمانی دۆناڵد ترەمپ ئۆپەراسیۆنێکی سەربازی بۆ لاوازکردنی ژێرخانی سەربازیی حووسییەکان و لەناوبردنیان دەستپێکردووە و، لە ڕێگەی دەیان هێرشی ئاسمانییەوە ناوچە جیاوازەکانی یەمەنی کردووەتە ئامانج و بەهۆیەوە سەدان هاووڵاتیی سڤیل و ئەندامی حووسییەکان کوژراون.

 

لێدوانی فەرمی: ڕۆژی هەینی سەرچاوەیەکی باڵا  لە فەرماندەیی ناوەندیی ئەمریکا ڕایگەیاند، لە هێرشە ئاسمانییەکانی ئەمریکا لەماوەی یەک مانگی ڕابردوودا زیاتر لە 800 شوێنیان کردووەتە ئامانج و زیاتر لە 650 حووسی کوژراون.

 

زانیاریی زیاتر: بەگوتەی ئەو بەرپرسە لە ئاکامی ئەو هێرشانەدا 87%  مووشەکە بالیستییەکانی حووسییەکانیان لەناو بردووە.

 

ئەمەش بزانە: ئیدارەی ترەمپ جەختی لەوە کردەوە کە ئامانجی ئەم ئۆپەراسیۆنە سەربازییانە بۆ ناچارکردنی حووسییەکانە بۆ ڕاگرتنی هێرشەکانیان بۆ سەر کەشتییە بازرگانییەکان لە دەریای سوور.

 

بۆچوونی لایەنی بەرامبەر: هەفتەی ڕابردوو حووسییەکانی یەمەن ڕایانگەیاند: تا ئێستا ئەمریکا زیاتر لە هەزار هێرشی ئاسمانی کردووەتە سەر ناوچە جیاوازەکانی یەمەن و بەهۆیەوە سەدان هاووڵاتیی سڤیل کوژراون.