ئەمریکا ناوەندێکی پەنابەران لە یەمەن بۆردوومان دەکات

ئاڤا نیوز

 

میدیاکانی حووسییەکان بڵاویانکردەوە، بەهۆی هێرشێکی ئاسمانی ئەمریکا بۆ سەر ناوەندێکی پەنابەران لە باکووری یەمەن 68 کەس کوژران و تاوەکو ئێستا ژمارەی برینداربووان بە دروستی دیار نەکراوە.

 

زانیاریی بەدەستهاتوو: بەرەبەیانی ڕۆژی دووشەممە 28-4-2025، میدیاکانی سەر بە حووسییەکان بڵاویانکردەوە: ئەمریکا هێرشێکی بەرفراوانی کردووە سەر ناوەندی دەستبەسەرکردنی کۆچبەرانی ئەفریقی لە سەعدەی باکووری یەمەن بەهۆیەوە دەیان کەس کورژان و برینداربوون.

 

ڕاگەیێنراوی فەرمی: وەزارەتی ناوخۆیی حکومەتی حووسییەکان ڕایگەیاند: ئەو ناوەندەی ئەمریکا بۆردوومانی کردووە لەژێر چاودێریی ڕێکخراوی نێودەوڵەتی کۆچ و خاچی سووردایە و بەئامانجگرتنی "تاوانێکی جەنگی تەواوە و دەبێت ئەمریکا بەرپرسیارەتی تەواوی ئەو تاوانەی دژی کۆچبەرانی ئەفریقی کردووە بگرێتە ئەستۆ".

ئەوەی پیویستە بیزانیت: لەو ناوەندەدا 115 کەس دەمێنێتەوە بەهۆی هێرشەکەوە 68 کەس کوژران و تاوەکو ئێستا ژمارەی برینداربووان بە دروستی دیار نەکراوە کە برینی زۆربەیان سەختە، هاوکات تیمەکانی فریاگوزاری و بەرگری شارستانی یەمەن بەردەوامن لە کارەکانیان بۆ دەرهێنانی قوربانییەکان لە ژێر داروپەردوی ناوچەکە.

 

باکگراوند: ڕۆژی 15-3-2025، دۆناڵد ترەمپ، سەرۆکی ئەمریکا فەرمانی دەستپێکردنی ئۆپەراسیۆنی  سەربازیی دژی حووسییەکان دەرکرد و هەڕەشەی لە ناوبردنی تەواوی تواناکانی ئەو گرووپەی نزیک لە ئێرانی کرد و وەک بەشێک لە هەوڵەکانی واشنتن بۆ سنووردارکردنی هەڕەشەکانی گرووپەکە بۆ سەر کەشتییەکانی لە دەریای سوور.