عێراق لە ئازادیی کاری ڕۆژنامەنووسیدا 155هەمین وڵاتی جیهانە

ئاڤا نیوز

ڕێکخراوی پەیامنێرانی بێ سنوور ڕاپۆرتی ساڵی 2025ی تایبەت بە ئازادیی کاری ڕۆژنامەنووسی لە 180 وڵاتی جیهاندا بڵاوکردەوە، بەگوێرەی ڕاپۆرتەکە نەرویج باشترین و چین خراپترین وڵاتی جیهانن بۆ ئازادیی ڕۆژنامەنووسی، عێراقیش لەم بوارەدا پلەی 155هەمینی وەرگرتووە.

چیرۆکی سەرەکی: لە ڕۆژی جیهانی ئازادی کاری ڕۆژنامەوانیدا ڕێکخراوەکانی بواری پاڵپشتی لە میدیا و ڕۆژنامەنووسان داوا لە پەرلەمانی عێراق دەکەن یاسای بەدەستهێنانی زانیاریی پەسەند بکات کە بەهۆیەوە شەفافیەت دێتەئاراوە و باشتر دەتوانرێت هەنگاو بۆ ڕووبەڕووبوونەوەی گەندەڵی بنرێت، داواش دەکەن ڕێگریی بکرێت لەوەی یاساکان بۆ بێدەنگکردنی ڕۆژنامەنووسان بەکاربهێنرێت.

ڕاگەیێنراوی فەرمی: ڕێکخراوی پەیامنێرانی بێ سنوور لە ڕاپۆرتەکەیدا دەڵێت، لەکۆی 180 وڵاتی جیهان کە ڕێکخراوی پەیامنێرانی بێ سنوور هەڵسەنگاندنی بۆ کردوون، نەرویج، دانیمارک و سوید بە باشترین وڵاتانی جیهان بۆ ئازادی ڕۆژنامەوانی دیاریکراون، وڵاتانی عەرەبیش بەگشتی کەوتوونەتە دواوەی ڕیزبەندییەکە و قەتەر کە لە پلەی 84 هەم دایە بەراورد بە وڵاتانی دیکەی عەرەبی زۆرترین خاڵی بەدەستهێناوە، دواتریش تونس، مەغریب، لوبنان و کوێت دێن.

ژمارەکان وادەڵێن: بەراورد بە ساڵی ڕابردوو عێراق 14 پلە پێشکەوتنی بەدەستهێناوە، عێراق لە ڕیزبەندییەکەدا 10هەمین باشترین وڵاتی عەرەبییە بۆ ئازادی ڕاگەیاندن، بەوەش پێش هەریەکە لە فەڵەستین، ئیمارات، سعودیە و میسر کەوتووە.

ئەمەش بزانە: هەریەکە لە چین، کۆریای باکوور، ئیریتریا و سووریا وەک خراپترین وڵاتانی جیهان بۆ ئازادی کاری ڕۆژنامەنووسی دیاریکراون، ئەویش بەهۆکاری توندی چاودێری حکومەت لەسەر کاری ڕۆژنامەنووسی، زۆری پێشێلکارییەکان و ترس لە سزادان بەهۆی کاری ڕۆژنامەنوسییەوە.