وەزارەتی پێشمەرگە و بەرگریی عێراق پرسی تیرۆر تاوتوێ دەکەن

ئاڤا نیوز

هەردوو وەزارەتی پێشمەرگە و بەرگریی عێراق کۆبوونەوە و جەختیان لەسەر بەردەوامیدان بە ئۆپەراسیۆنەکانی دژی خانە نوستووەکانی داعش کردەوە.

چیرۆکی سەرەکی: فەریق ڕوکن عیسا عوزێر، سەرۆکی ئەرکانی وەزارەتی پێشمەرگە و شاندی یاوەری سەردانی فەریق شوان مەزهەر ڕواندزی، ئەمینداری گشتیی وەزارەتی بەرگریی عێراقیان کرد لە بەغدا، پرسە ئەمنییە هاوبەشەکانی نێوان هەرێـمی کوردستان و عێراق تاوتوێ کران.

ڕاگەیێنراوی فەرمی: وەزارەتی بەرگریی عێراق لە ڕاگەیێنراوێکدا ڕایگەیاند: لە میانی دیدارەکەدا جەخت لەسەر بەردەوامیی هاوکاری هاوبەش و هەماهەنگیی ئاست بەرزی نێوان هێزە ئەمنییەکان کرایەوە، هاوکات بەردەوامیدان بە ئۆپەراسیۆنە هاوبەشەکان بۆ نەهێشتنی تیرۆریستان لە ناوچەکەدا جەختی لێکرایەوە.

ئەوەی پێویستە بیزانیت: لە ساڵی 2017، هێزەکانی پێشمەرگە و ‌هێزە چەکدارەکانی عێراق بە هاوکاریی هاوپەیمانی نێودەوڵەتی شكستیان بە ڕێکخراوی داعش هێنا، بەڵام مەترسی تیرۆر و داعش لەسەر هەرێمی کوردستان و عێراق کۆتایی نەهاتووە، هێزەکانی پێشمەرگە و سوپای عێراقیش بە هاوبەشی بەردەوام ئۆپەراسیۆن و کێوماڵکردن دژی ئەو شانە نوستووانە ئەنجامدەدەن.