ئەمریكا ژمارەیەكی زۆر درۆن و مووشەكی حووسییەكان لەناودەبات

ئاڤا نیوز

بەیانی ئەمڕۆ هەینی، ئەمریکا ڕایگەیاند نۆ مووشەکی بالیستیکی دژە کەشتی و دوو فڕۆکەی بێ فڕۆکەوانی حووسییەکانی لە یەمەن لەناو بردووە.

ڕاگەیێنراوی فەرمی: فەرماندەی فەرماندەیی ناوەندیی ئەمریکا (سێنتکۆم) ڕایگەیاند: ئەو چەکانەیان کاتێک لەناوبردووە کە حووسییەکان چوار مووشەکی دژە کەشتییان ئاڕاستە کردووە، دوانیان لە کەنداوی عەدەن و دوانیشیان لە دەریای سوور کەوتوونەتە خوارەوە بەبێ ئەوەی هیچ زیانێکیان هەبێت.

زانیاریی زیاتر: سێنتکۆم ئاماژەی بەوەکردووە لە هێرشەکەی حووسییەکاندا هیچ کەشتییەکی ئەمریکا و هاوپەیمانەکانی زیانیان بەر نەکەوتووە.

باکگراوند: لە 19 ی نۆڤەمبەری ڕابردووەوە، حووسییەکان کە ئێران پشتیوانییان دەکات بەردەوامن لە هێرشکردنە سەر کەشتییە بازرگانی و سەربازییەکان لە دەریای سوور و دەریای عەرەب و کەنداوی عەدەن، بەگومانی ئەوەی ئەو کەشتییانە پەیوەندییان بە ئیسرائیلەوە هەیە و هێرشەکانیشیان وەک پشتیوانییەک بۆ حەماس و گەلی فەڵەستین وێنا دەکەن کە لەحەوتی ئۆکتۆبەری ساڵی ڕابردووەوە هەریەک لە حەماس و ئیسرائیل لە شەڕێکی سەختدان لە کەرتی غەززە.