فایلی خەڵک؛ ئاڤا بەدواداچوون بۆ داواکارییەکی خەڵکی گوندی کەژەکی برادۆست دەکات

ئاڤا نیوز

خەڵکی گوندی کەژەکی دەڤەری برادۆست لە ئیدارەی سەربەخۆی سۆران بەدەست خراپیی بەشێکی شەقامی گوندەکەیان هەراسان بوون و داوا لە ئاڤا دەکەن دەنگیان بگەیێنرێتە لایەنی پەیوەندیدار.

وێنە گەورەکە: لە شەقامێکی هەشت کیلۆمەتری گوندی کەژەکی دەڤەری برادۆست لە ئیدارەی سەربەخۆی سۆران چوار کیلۆمەتری لێ قیڕ کراوە و چوارەکەی تریان وەکو خۆی بەجێهێڵدراوە، ئەو بەشەشی کە قیرتاو نەکراوە ڕێگەی سەرەکیی قوتابخانە، بنکەی تەندروستیی و شەش گوندی دیکەی لەسەرە و بە گوتەی خەڵکەکە جادەکەیان بەتەواوی وێران بووە.

لێدوانی فەرمی: موختاری گوندی کەژەک بە ئاڤای ڕاگەیاند، پێنج جار سەردانی لایەنە پەیوەندیدارەکانی ناوچەکەی کردووە و داوای لێکردوون شەقامی گوندەکەیان بۆ قیرتاو بکەن، بەڵام بەدەم داواکانیانەوە نەچوون.

لەلایەکی دیکەوە: ئیحسان چەلەبی، قایمقامی سیدەکان لەبارەی چارەسەرکردنی کێشەکە بە ئاڤای گوتووە: هۆکاری تەواونەکردنی شەقامەکە نەبوونی بوودجەیە.

- ئێستا تەندەرمان ڕاگەیاندووە، هەر کەس و کۆمپانیایەک تەندەر وەربگرێت دەست بە تەواوکردنی دەکرێت.