ئاگادرییەکی گرنگ لە کۆمیسیۆنەوە بۆ نزیکە 650 هەزار کەس

ئاڤا نیوز

 

تا ئێستا 641 هەزار و 19 کەس داواکارییان پێشكەش كۆمسیۆنی سەربەخۆی هەڵبژاردنەكان كردووە تا لە كاتی دەنگدانی هەڵبژاردنی پەرلەمانی عێراق بچنە سەر سندووقی دەنگدان كە 95 هەزار و 406 کەسیان لە هەرێمی کوردستانن.

 

وێنە گەورەکە: لە چوارچێوەی ئامادەکارییەکانی کۆمیسیۆنی سەربەخۆی هەڵبژاردنەكان بۆ هەڵبژاردنی پەرلەمانی عێراق، لە سێی مانگی ڕابردوو دەرگای پێشکەشکردنی داواکاری بۆ دامەزراندنی کارمەندانی سەر سندووق کردەوە.

 

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق هەموو ئەو کەسانەشی ئاگادار كردووەتەوە كە پێش کۆتاییهاتنی ماوەی پێشکەشکردنەكە دەبێت دوو فۆڕمی ئەلیکترۆنی بە شێوەی كاغەز چاپ بکەن و لە نزیکترین بنکەی تۆماری دەنگدەران پێشکەشی بکەن، ئەگەرنا ناوی لە تیروپشکی ئەلیکترۆنی دەردەهێنرێت.

 

زانیاریی زیاتر: نۆی ئەم مانگە، ماوەی پێشکەشکردنی داواکاری بۆ دامەزراندنی کارمەندانی سەر سندووق کۆتایی دێت و پێش ئەو وادەیە دەبێت ئەو کەسانەی داواکارییان پێشکەش کردووە، ئەم ڕێکارە ئەنجام بدەن.

 

ئەمەش بزانە: پڕۆسەی هەڵبژاردنی پەرلەمانی عێراق، پێویستی بە 250 هەزار کارمەندی سەر سندووق هەیە، لەو ژمارەیە زیاتر لە 42 هەزار کارمەندیان بۆ هەرێمی کوردستانە.

 

ئەوەی پێویستە بیزانیت: کۆمیسیۆن سێ جۆری کارمەند وەردەگرێت، کارمەندی یەدەگ، بەڕێوەبەری وێستگە و مونەسیقی بنکە، پاداشتەکەش لە 100 هەزار دینارەوە دەستپێدەکات بۆ 350 هەزار دینار.

• کارمەندی ئاسایی کە پێیان دەگوترێت کارمەندی یەدەگ 100 هەزار دیناریان بۆ خەرج دەکرێت. 
  
  ٠ بەڕێوەبەری وێستگە 250 هەزار دینار، ئەگەر فەرمانبەر بێت 150 هەزار دینار و سوپاس و پێزانینێک وەردەگرێت ئەمەش بۆ پلە بەرزکردنەوەی سوودی دەبێت.
  
  
• بەڕێوەبەری بنکە 350 هەزار دیناری بۆ خەرج دەکرێت.