حەماس و ئیسرائیل لەبارەی دانوستانەوە یەکتر تۆمەتبار دەکەن

ئاڤا نیوز

دانوستانەکانی ئیسرائیل و حەماس لە دەوحەی قەتەر بەردەوامن، بەڵام هەندێک پرس بوونەتە ئاستەنگ بۆ بەرەوپێشچوونی دانوستانەکان.

چیرۆکی سەرەکی: لە هەفتەی ڕابردووەوە دانوستانەکانی ئیسرائیل و حەماس بۆ ڕاگەیاندنی ئاگربەستێکی گشتگیر و ئازادکردنی بارمتەکان لە دەوحەی قەتەر بەردەوامن، بەڵام هەردوولا یەکتر لەسەر ئاستەنگ دروستکردن بۆ دانوستانەکان تۆمەتبار دەکەن.

زانیاریی بەدەستهاتوو: سەرچاوەیەکی فەلەستینی بە ئاژانسی فرانس پرێسی ڕاگەیاند: دانوستانەکانی دەوحە بەهۆی پێداگریی ئیسرائیل لەسەر نە کشانەوەی لە کەرتی غەززە ڕووبەڕووی بەربەست و ئاستەنگی ئاڵۆز بووەتەوە و ئیسرئیل داوا دەکات لە %40 خاکی غەززە بمێنێتەوە بەڵام حەماس ئەمە ڕەتدەکاتەوە و بە داگیرکاری ناوی بردووە.

لەلایەکی دیکەوە: بەرپرسێکی ئیسرائیل، بزووتنەوەی حەماسی تۆمەتبار کردووە بەوەی ئاستەنگ لە بەردەم دانوستانەکان دروست دەکات بەوەی شەڕی دەروونی دەکات و دەڵێت ئامانجی سەرەکی حەماس تێکدانی دانوستانەکانە.