نزیکەی یەک ترلیۆن دینار لە نۆ پرۆژەی ئاو خەرج دەکرێت

ئاڤا نیوز

لە شەش ساڵی ڕابردوو نزیکەی یەک ترلیۆن دینار لە پڕۆژەکانی ئاو و ئاوەڕۆ خەرجکراوە و ئاڤا میدیا وردەکاریی ئەو پڕۆژانە دەخاتەڕوو.

وێنە گەورەکە: کابینەی نۆیەمی حکومەتی هەرێمی کوردستان لە ماوەی شەش ساڵی ڕابردوودا نزیکەی یەک ترلیۆن دینار لە نۆ پرۆژەی ئاو و ئاوەڕۆی لە سنووری شار و شارۆچکەکانی هەرێمی کوردستان خەرجکردووە، بەم پڕۆژانەش دەیان هەزار هاونیشتمانی لە کەمئاوی ڕزگاریان دەبێت.

زانیاریی بەدەستهاتوو: ئاڤا میدیا زانیاریی تەواوی لەسەر گوژمەی ئەو نۆ پڕۆژەیە دەستکەوتووە و تێچووەکانیان بەم شێوەیەن:

یەکەم: تێچووی پڕۆژەی ئاوی فریاگوزاریی خێرای هەولێر 480 ملیار دینارە.

دووەم: تێچووی پڕۆژەی ئاوی قوشتەپە 190 ملیار دینارە.

سێیەم: تێچووی پڕۆژەی ئاوی گۆپتەپە 78 ملیار دینارە.

چوارەم: تێچووی پڕۆژەی ئاوی پیرمام و دەوروبەری 35 ملیار دینارە.

پێنجەم: تێچووی پڕۆژەی ئاوی فایدە - دهۆک 50 ملیار دینارە.

شەشەم: تێچووی پڕۆژەی دابینکردنی ئاوی ئاکرێ زیاتر لە 41 ملیار دینار.

حەوتەم: تێچووی پڕۆژەی ئاوی ڕانیە - چوارقوڕنە - حاجیاوا نزیکەی 37 ملیار دینارە.

هەشتەم: تێچووی پڕۆژەی گەیاندن و دانانی تۆڕی ئاو بۆ 51 گوندی دەڤەری بارزان زیاتر لە 30 ملیار دینار.

نۆیەم: تێچووی پڕۆژەی ئاوی دەربەندیخان نزیکەی 20 ملیار دینارە.

بۆچی گرنگە: سەدان هەزار هاونیشتمانی سوود لە جێبەجێکردنی ئەم پڕۆژانە وەردەگرن، جگە لەمەش کاریگەریی وشکەساڵی لەسەر ئەو ناوچانە کەمتر دەبێتەوە و کاریگەریی ڕاستەوخۆ لەسەر ئاوی ژێر زەوی دروست دەکات.