گۆڕانی کەشوهەوا گرنگترین بابەتی هەڵبژاردنەکانی یەکێتیی ئەوروپا دەبێت

ئاڤا نیوز

 

لە حوزەیرانی داهاتوو پرۆسەی هەڵبژاردنی پەرلەمانی یەکێتیی ئەوروپا بەڕێوەدەچێت، دامەزراوەیەک ڕاپرسییەکی کردووە و دەرکەوتووە، گۆڕانی کەشوهەوا گرنگترین کاری لەپێشینەی دەنگدەرانە.

 

وێنە گەورەکە: بە گوێرەی ڕاپرسییەک کە ئیرۆ نیوز، دامەزراوەی هەواڵی یەکێتیی ئەوروپا کردوویەتی، 52%ـی بەشداربووان لەو باوەڕەدان کە ڕووبەڕووبوونەوەی گۆڕانی کەشوهەوا بابەتێکی لەپێشینەیە، 32%ـیان پێیانوایە کە ئەوە بابەتێکی گرنگە بەڵام لەپێشینە نییە، هاوکات 16%ـیش لەو باوەڕەدان کە بابەتێکی لاوەکییە نەک سەرەکی. 

 

زانیاریی زیاتر: ڕاپرسییەکە لە 18 وڵاتی ئەندامی یەکێتیی ئەوروپا کراوە کە 96%ـی کۆی دانیشتووانی یەکێتیی ئەوروپا لەخۆ دەگرن و 25 هەزار و 916 کەس بەشدارییان تێدا کردووە؛ ئەم ڕاپرسییە لەکاتێکدایە کە بڕیارە ‌لە حوزەیرانی داهاتوو، هەڵبژاردنی پەرلەمانی یەکێتیی ئەوروپا بەڕێوەبچێت.