بەهۆی شەڕەوە نرخی کیلۆیەک هەنگوین لە غەززە گەیشتووەتە 100 دۆلار

ئاڤا نیوز

بەهۆی جەنگ و بارودۆخی نالەباری غەززەوە، مەترسیی لەناوچوون لەسەر هەنگ و کەرتی هەنگەوانی دروست بووە.

چیرۆکی سەرەکی: بەهۆی هێرشەکانی ئیسرائیلەوە بۆ سەر کەرتی غەززە، بەشێکی زۆری کێڵگەکانی بەخێوکردنی هەنگ لەناوچوون و زیانێکی زۆر بە هەنگەوانەکان گەیشتووە. هەنگەوانەکان بەهۆی جەنگ و لەناوچوونی کەلوپەلەکانیانەوە، ناتوانن درێژە بە کاری هەنگەوانی بدەن.

لێدوانی فەرمی: ئەمیر لوتفی عید، یەکێک لە هەنگەوانەکان، لەبارەی هێرشەکان و لەناوچوونی پوورەی هەنگەکانییەوە دەڵێت: "ئیسرائیل سەرەڕای هێرشکردنە سەر کێڵگەکانی بەخێوکردنی هەنگ، ڕووبەرە سەوزاییەکانیشی کردووەتە ئامانج، کە بووەتە هۆی لەناوبردنی ژینگە و خاکی بەپیتی غەززە."

ئەمیر لوتفی گوتیشی، "بەهۆی بۆردوومانەکانی ئیسرائیلەوە کێڵگەکەم لەناوچوو، بەڵام توانیم پاش هەوڵ و کۆششێکی زۆر، بەشێکی بچووکی دروست بکەمەوە."

ئەو دەشڵێت، "جگە لە بەئامانجگرتن و کوشتنی هەنگەکان، تەنانەت بەهۆی دووکەڵی بۆردوومانەکانیشەوە هەنگەکان پوورەکانیان جێدەهێڵن و کۆچ دەکەن، ئەمەش بووەتە هۆی لەناوچوونی بەرهەمهێنانی هەنگوین."

لەلایەکی دیکەوە: تۆڕی ڕێکخراوە ناحکومییەکانی فەڵەستین (PINGO) ڕایگەیاندووە، لە کۆی 30 هەزار پوورەی هەنگ، 27 هەزاریان لەناوچوون، کە دەکاتە زیاتر لە 90%ی پوورەکانی کەرتی غەززە. هاوکات 97%ی ئەو ڕووبەرە سەوزاییانەی کە بە سەرچاوەی سەرەکیی خۆراکی هەنگەکان دادەنران، لەناوچوون.

زانیاریی زیاتر: جەنگ نرخی کیسێک شەکری لە غەززە گەیاندووەتە هەزار دۆلار. هەنگوینی سپی کە پێش جەنگ نرخەکەی 24 دۆلار بوو، ئێستا نرخی یەک کیلۆی نزیکەی 100 دۆلارە.