نیویۆرک تایمز: لە بەرامبەر ئاگربەستدا دەبێت ئۆکراینا دەستبەرداری بەشێک لە خاکەکەی ببێت

ئاڤا نیوز

ڕۆژنامەیەکی ئەمریکی، بەشداریکردنی سەرکردەی وڵاتانی ئەوروپی لە کۆبوونەوەکەی ڕۆژی دووشەممەی نێوان دۆناڵد ترەمپ، سەرۆکی ئەمریکا و ڤۆلۆدیمێر زێلێنسکی، سەرۆکی ئۆکراینا لە کۆشکی سپی ئاشکرا دەکەن. بە گوێرەی ڕۆژنامەکە، ئۆکراینا لە بەرامبەر ئاگربەستدا دەبێت دەستبەرداری بەشێک لە خاکەکەی ببێت.

زانیاریی بەدەستهاتوو: ڕۆژنامەی نیویۆرک تایمزی ئەمریکی بڵاویکردووەتەوە، دوو بەرپرسی باڵای ئەوروپا ئەوەیان بۆ ڕۆژنامەکە ئاشکراکردووە، ترەمپ دوای کۆبوونەوەی لەگەڵ ڤلادیمێر پووتین، سەرۆکی ڕووسیا لە ئەلاسکا، پلانێکی بۆ کۆتاییهێنان بە جەنگی ئۆکراینا پێشنیاز کردووە. پلانەکە بریتییە لە دەستبەرداربوونی ئۆکراینا لە بەشێک لە خاکی وڵاتەکەی ئێستا ناوچەی جەنگ نین.

ڕۆژنامەکە ئەوەشی ئاشکراکردووە، بڕیارە ترەمپ ڕۆژی دووشەممە لە کۆشکی سپی ئەم پلانە لەگەڵ زێلێنسکی تاوتوێ بکات و بە وتەی ئەو دوو بەرپرسە باڵایەی ئەوروپا، سەرکردەکانی ئەوروپاش لە کۆبوونەوەکەدا بەشدار دەبن.

بۆچوونی لایەنی بەرامبەر: زێلێنسکی و سەرکردەکانی ئەوروپا بە توندی دژایەتیی پێشنیازێکی لەو شێوەیە دەکەن و ئەوان جەختیان لەوە کردووەتەوە کە ئەو ناوچانە، جگە لەوەی هێڵی بەرگریی گرنگیان تێدایە، دەوڵەمەندیشن بە سەرچاوە کانزاییەکان، هەروەها وازهێنانی هەمیشەیی لە هەر بەشێکی خاکی ئۆکراینا پێشێلکردنی دەستووری وڵاتەکەیە.

بە وتەی بەرپرسە ئەوروپییەکان، لە بەرامبەر دەستبەرداربوونی ئۆکراینا لەو خاکانەی وڵاتەکەی، پووتین پێشنیازی کردووە کە ئاگربەست لە ناوچەکانی دیکەی ئۆکراینا ڕابگەیەنێت کە ئێستا جەنگ تیایاندا بەردەوامە و بەڵێنێکی نووسراوی داوە کە جارێکی دیکە هێرش نەکاتەوە سەر ئۆکراینا و وڵاتانی ئەوروپا. ئەو بەرپرسانە ئاماژەیان بەوەش کردووە، پووتین پێشتریش چەندین جار بەڵێنە نووسراوەکانی خۆی پێشێل کردووە.