پەنابەرێکی ڕۆژئاوای کوردستان بە تای خوێنبەربوون گیانی لەدەست دا

ئاڤا نیوز

دوای ئەوەی گومانی توشبوون بە تای خوێنبەربوون لە ئاوارەیەکی کەمپی دۆمیز دەکرێت، سامپڵی خوێنی لێ وەردەگیرێت و ڕەوانەی بەغدا دەکرێت.

وێنە گەورەکە: تای خوێنبەربوون نەخۆشییەکی ڤایرۆسییە و لە ڕێگەی ئاژەڵەوە بۆ مرۆڤ دەگوازرێتەوە، ئەم نەخۆشییە لە پارێزگاکانی عێراق و هەرێمی کوردستان بڵاوبووەتەوە.

لێدوانی فەرمی: د. ئەفراسیا مووسا، بەڕێوەبەری گشتیی تەندروستی دهۆک بە ئاڤا میدیای ڕاگەیاند: 16 ڕۆژ پێش ئێستا پەنابەرێکی ڕۆژئاوای کوردستان، کە لە کەمپی دۆمیز دەژیا و پیشەی قەساب بوو، گومانی توشبوون بە نەخۆشی تای خوێنبەربوونی لێکرا، بۆیە سامپڵی خوێنی لێ وەرگیرا و ڕەوانەی بەغدا کرا.

بەڕێوەبەری تەندروستیی دهۆک دەڵێت: نەخۆشەکە بەبێ ئاگادارکردنەوەی دکتۆرەکان نەخۆشخانەی بەجێهێشتووە و مۆبایلی داخستووە، دوای بەدواداچوونەکانمان زانیمان گیانی لە دەست داوە و لە ڕۆژئاوای کوردستان نێژراوە، بەڵام نازانین لە دهۆک یان ڕۆژئاوای کوردستان مردووە.

زانیاریی زیاتر: لە مانگی سێی ئەمساڵەوە تاوەکو ئێستا 10 گومان لێکراوی تای خوێنبەربوون هەبووە، بەڵام تەنیا چوار حاڵەتیان پۆزەتیڤ بوون، لەو ژمارەیەش دوانیان گیانیان لەدەست داوە.