بەرپرسانی یەکێتی ڕێگە دەدەن کەناڵی زووم لە سلێمانی بکرێتەوە؟

ئاڤا نیوز

ئاڤا میدیا بەدواداچوون بۆ داخستنی کەناڵی زوومی نزیک لە لاهوور شێخ جەنگی دەکات و هەوڵەکان بۆ دەستپێکردنەوەی پەخشی کەناڵەکە ئاشکرا دەکات.

وێنە گەورەکە: بەرەبەیانی هەینی ڕابردوو، زیاتر لە 10 هەزار کەس لە دژەتیرۆر، کۆماندۆ و ئاسایشی یەکێتی بە تانک، تۆپ، درۆن و دۆشکە و بیکەیسی و چەندین چەکی جیاوازەوە هێرشیان کردە سەر هۆتێل لالەزار و شوێنی مانەوەی لاهوور شێخ جەنگی لە گەڕەکی سەرچناری شاری سلێمانی، دواتر هێزێکی چەکدار چووەتە سەر کەناڵی زووم لە پرۆژەی نیشتەجێبوونی دەروازە ستی، دەستیان بەسەر ئۆفیسی کەناڵەکەدا گرتووە.

لێدوانی فەرمی: هێمن مەحموود، بەڕێوەبەری کەناڵی زووم بە ئاڤای وت: هەوڵەکانمان بۆ کردنەوەی کەناڵەکە و گەڕاندنەوەی کەرەستەکانمان بەردەوامە، داوامان کردووە ئەو هێزەی چووەتە سەر کەناڵەکە، بڕۆنە دەرەوە و ئێمەش بگەڕێینەوە بۆ سەر کارەکانمان، چونکە نامانەوێت دەستبەرداری کەناڵەکەمان بین و بەردەوامی بە کاری میدیایی خۆمان دەدەین.

زانیاریی زیاتر: بە گوتەی هێمن مەحموود، نازانن ئەو هێزەی یەکێتی چ کەرەستەیەکی کەناڵەکەیان بردووە و داوا دەکەن بە زووترین کات بۆیان بگەڕێننەوە.

گۆشەیەکی دیکەی دیمەنەکە: سەنتەری میترۆ بۆ داكۆكیكردن لە ڕۆژنامەنووسان، هەوڵ دەدات بەرپرپسانی یەکێتی ڕازی بکات بەوەی کەناڵەکە بکرێتەوە و ئەو هێزە چەکدارەش دوور بخرێتەوە کە چووەتە سەر ئۆفیسی کەناڵەکە، بەڵام تاوەکو ئێستا هیچ ئەنجامێکی نەبووە و یەکێتی هیچ نەرمییەکی لەوبارەیەوە نەنواندووە.