نووری مالیكی هۆشداریی دەدات: هەڵبژاردن دوابخرێت پرۆسەی سیاسی هەرەس دەهێنێت

ئاڤا نیوز

نووری مالیکی، سەرۆکوەزیرانی پێشووتر و سەرۆکی هاوپەیمانیی دەوڵەتی یاسا ڕایگەیاند: هەڵبژاردنی پەرلەمان لە کاتی خۆیدا ئەنجام دەدرێت و دواناخرێت بەڵام ئەگەر پرۆسەکە دوابخرێت پرۆسەی سیاسی هەرەس دەهێنێت.

وێنە گەورەکە: کەمتر لە سێ مانگ ماوە بۆ بەڕێوەچوونی هەڵبژاردنی پەرلەمانی عێراق، پێشبینی دەکرێت لە ماوەی داهاتوودا، ئیسرائیل بە هاوکاریی ئەمریکا هێرش بکاتە سەر پێگەی گرووپە چەکدارەکان ئەگەر یاسای دەستەی حەشدی شەعبی پەسەند بکرێت و مەترسیی ئەوە هەیە ئەو وڵاتە لە داهاتوودا ببێتە گۆڕەپانی شەڕ لەنێوان ئیسرائیل و ئێران.

لێدوانی فەرمی: مالیکی، لە میانەی دیداری لەگەڵ کۆمەڵێک کەسوکاری شەهیدان و برینداران وتی: هەڵبژاردن هەلومەرج و پرەنسیپی خۆی هەیە و هەڵبژاردنی داهاتووی پەرلەمانی عێراق لەكاتی خۆیدا بەڕێوەدەچێت و به هیچ شێوەیەک گۆڕانكاری تیادا ناكرێت، ئەگەر دوابخرێت پڕۆسەی سیاسی هەرەس دەهێنێت و  پەرلەمان و حکومەت ڕەوایەتییان نامێنێت.

ناوبراو ئاماژەی بەوەشكرد: هیچ کەس ناتوانێت دەستەی لێپرسینەوە و دادپەروەری هەڵبوەشێنێتەوە، چارەنووسی دەستەكە بەستراوەتەوە بە دەستوورەوە و نەبوونی بە مانای ئاژاوەگێڕی دێت، هاوکات ڕۆڵی کۆمیسیۆنی بەرز نرخاند لە پشکنینی ناوی کاندیدە بەشدارەكان لە هەڵبژاردنەکاندا.

مالیکی داوای لە گەلی عێراق کرد بەشداری لەم "شایستە نیشتمانی و دەستوورییەدا بکەن، بەو پێیەی بناغەی پێکهێنانی حکومەت و بەردەوامبوونی پرۆسەی سیاسییە".