لە دیوانی پارێزگایەکی عێراق نۆ ملیار دینار دیار نامێنێت

ئاڤا نیوز

نۆ ملیار دیناری پارەی قەرەبووی زیانمەندانی تیرۆر لە دیوانی پارێزگای دیالە دیار نامێنێت و چوار کەس بە تۆمەتی دزینی ئەو بڕە پارەیە دەستگیردەکرێن.

چیرۆکی سەرەکی: لەماوەی هەشت مانگدا کۆمەڵێک کەس ناوە ناوە لە دیوانی پارێزگاکە پارەیان بردووە و یەکێک لەوانەی ئەو کارەی کردووە بەرپرسی ژمێریاییە، دواتر گومان دروست دەبێت و لەڕێی وردبینی و لێکۆڵینەوەی چەند بەرپرسێکی دیوانی پارێزگاکە دزییەکە ئاشکرا دەکرێت.

لێدوانیی فەرمی: "پێنج کەس تۆمەتبارن بە دزینی ئەو بڕە پارەیە، تا ئێستا چواریان دەستگیرکراون، یەکێک لەوانە بەرپرسی ژمێریارییە لە دیوانی پارێزگای دیالە"، کەریم عەلی ئاغا، پارێزگاری بە وەکالەتی دیالە ئەمەی بە میدیا عێراقییەکان ڕاگەیاندووە.

ئەوەی پێویستە بیزانیت: بردنی ئەو پارەیە لە ڕێگەی چەکی بانکییەوە کراوە، هەر جارەو بڕە پارەیەک بردراوە، دوایینیان کە چەند ڕۆژێک پێش ئێستا بووە، بڕی سێ ملیار دینار بووە.

لەلایەکی دیکەوە: لەسەر دیار نەمانی ئەو بڕە پارەیە، ئەسما حەمید کەمبش، ئەندامی ئەنجوومەنی نوێنەرانی عێراق داوای پێکهێنانی لیژنەیەکی لێکۆڵینەوەی کردووە.