وەزارەتی نەوتی عێراق: نەوت نەچووەتە ناو زەوییە کشتوکاڵییەکان

ئاڤا نیوز  

وەزارەتی نەوتی عێراق ئەو دەنگۆیانە ڕەتدەکاتەوە کە باس لەوە دەکەن لە کێڵگەی نەوتی حەمرینەوە، نەوت دزەی کردبێت بۆ کێڵگە کشتوکاڵییەکانی نزیک دامەزراوە نەوتییەکە لە پارێزگای سەڵاحەدین.

چیرۆکی سەرەکی: گرتە ڤیدیۆیەک لە تۆڕە کۆمەڵایەتییەکان بڵاوکراوەتەوە، لە گرتە ڤیدۆکەدا بانگەشەی ئەوە دەکرێت کە نەوت لە کێڵگەی نەوتی حەمرینەوە دزە دەکات بۆ ناو کێڵگە کشتوکاڵییەکان.

لێدوانی فەرمی: باسم محەممەد، بریکاری وەزارەتی نەوت بۆ کاروباری درهێنانی نەوت ڕایگەیاند: "ئەو بانگەشانە دوورن لە ڕاستییەوە، وەزارەتی نەوت ڕێوشوێنی گونجاوی گرتووەتەبەر، هاوکات تیمە تەکنیکی و ئەندازەیی و ژینگەپارێزییەکان کاریان لەسەر  چارەسەرکردنی ئەو زیانە ژینگەییانەش کردووە تیرۆریستانی داعش لەدوای خۆیان جێیانهێشتبوو".

زانیاریی زیاتر: وەزارەتی نەوت داوا لە هاووڵاتیان و میدیاکان دەکات "ورد و بابەتیانە بن و ڕاستییەکان نەشێوێنن لە ڕیگەی بەکارهێنانی ڤیدیۆی کۆن و زانیاری نادروست".