فەڵەستین ستایشی ڕۆڵی عێراق دەکات

ئاڤا نیوز  

سەرۆکی دەسەڵاتی فەڵەستین، پێزانینی حکومەت و گەلەکەی بۆ "هەڵوێستە مێژووییەکانی عێراق بۆ پشتیوانی لە دۆزی فەڵەستین" دەردەبڕێت.

چیرۆکی سەرەکی: چوارشەممە 15-5-2024، لە پەراوێزی 33یەمین کۆنفڕانسی لووتکەی عەرەبی لە مەنامە، سەرۆککۆماری عێراق و سەرۆکی دەسەڵاتی فەڵەستین کۆبوونەوە.

ڕاگەیێنراوی فەرمی: نووسینگەی ڕاگەیاندنی سەرۆکایەتیی کۆماری عێراق ڕایگەیاند: "لە دیدارەکەدا بارودۆخی ئێستای ناوچەکانی فەڵەستین و دەستدرێژیی بەربەریانە دژی گەلی فەڵەستین و کارەساتی مرۆیی لە دەرئەنجامی ئەو هێرشانە"، تاوتوێ کران.

زانیاریی زیاتر: د.لەتیف ڕەشید "هەڵوێستی پتەوی عێراقی بەرامبەر بە پرسی فەڵەستین دووپات کردەوە و جەختی لەسەر پێویستی ڕاگرتنی شەڕ و دەستبەجێ دەستڕاگەیشتن بە یارمەتییە مرۆییەکان بۆ خەڵکی کەرتی غەززە" کردەوە.

لە لایەکی دیکەوە: مەحموود عەباس پێزانینی حکومەت و گەلی فەلەستینی بۆ "هەڵوێستە مێژووییەکانی عێراق بۆ پشتیوانی لە دۆزی فەلەستین دەربڕی و ستایشی هەوڵەکانی عێراق و هاوکارییە هەمیشەییەکانی بۆ برا فەڵەستینییەکان کرد".